«африндин кейин мәнбич қатарлиқ районларниму террорчилардин тазилаймиз»

түркийә авази радийоси хәвири: әрдоған адаләт вә тәрәққийат партийәсиниң мәрсиндә чақирилған 6 – нөвәтлик пәвқуладдә қурултийида қилған сөзидә, түркийә армийәсиниң сүрийәниң африн районида бөлгүнчи террорлуқ тәшкилатлири п к к/к җ к/ п й д – й п г вә даеш террорчилирини бир тәрәп қилиш, дост вә қериндаш район хәлқини бесим вә зулумдин қутқузуш үчүн 20 – йанвар күни қозғиған «зәйтун шехи» һәрбий һәрикити тоғрулуқ тохталди.

түркийәниң тарихида һечқачан башқиларни мустәмликә қиливелиштәк бир әйиби болмиғанлиқини әскәрткән әрдоған, мундақ дәп көрсәтти: «биз ишғал күчлирини наһайити обдан билимиз. җүмлидин, террорлуқ тәшкилатиниң вә бу тәшкилатқа йардәм бериватқанларниң сүрийәдә немини мәқсәт қиливатқанлиқини наһайити обдан билимиз. шуңа, биз уларға қарши һәрбий һәрикәтни давамлаштуруватимиз. әмма шуни алаһидә тәкитләп өтимәнки, һечким бизни хата чүшинип қалмаслиқи, бизниң күчимизни сәл чағлимаслиқи лазим. әгәр бизни хата чүшинип қалса вә күчимизни сәл сағлиса, у чағда биз уларға күчимизни көрситип қойимиз.»

әрдоған сөзиниң ахирида мундақ деди: «җәраблусни, раини, әлбанни террорчилардин тазилиғандин кейин, су, ток билән тәминләш, маарип хизмитини йолға қойуш, ул әслиһә қурулуш хизмәтлирини ишқа кириштүрүштә қандақ қилған болсақ, африндиму шундақ қилимиз.  африндин террорчиларни тәлтөкүс тазилап болғандин кейин мәнбич, әйн әләрәб, тәләбйад, рәсуләйн, қамишли қатарлиқ <фират дәрйаси> ниң шәрқидики районларниму террорчилардин тазилаймиз.»