quddus toghrisidiki meydanimizdin hergiz waz kechmeymiz

türkiye awazi radiyosi xewiri: jumhur reis rejep tayyip erdoghan resmiy dölet ishliri ziyaritide bolghan mawritaniyede, pirézidént muhemmed weled abduleziz teripidin sheripige bérilgen ziyapetke qatnashti.

u gherbiy afriqa ziyaritining üchinchi békiti bolghan sénégalgha qarap yolgha chiqishtin burun mawritaniye ayrodurumida pirézidént muhemmed weled abduleziz bilen ortaq axbarat élan qilish yighini ötküzdi.

jumhur reis rejep tayyip erdoghan mawritaniye bilen türkiye otturisida özara menpeet yetküzüsh pirinsipigha tayanghan hemkarliqning shekillendürülidighanliqini, bolupmu türkiye xususiy shirketlirini sélinmilirini köpeytishke ilhamlanduruwatqanliqlirini qeyt qildi.

rejep tayyip erdoghan 2017-yili dékabirda iqtisad ministiri nihat zeybekchining soda-sanaetchiler bilen mawritaniyeni ziyaret qilghanliqini xatiriletti. u bügünmu özi bilen birge mawritaniyege kelgen türkiyelik soda-sanaetchilerning mawritaniyelik soda-sanaetchiler bilen birlikte yighin uyushturghanliqini bildürdi.

 u yéqinqi künlerde béliqchiliq saheside janlinishning meydangha kelgenlikini eskertip, mundaq dédi:

«hazirmu 40 tin artuq béliqchi paraxotimiz mawritaniyede paaliyet qiliwatidu. mawritaniyening kanchiliq saheside intayin muhim yoshurun küchi barliqini bilimen, türkiyeningmu bu sahede muhim tejribiliri bar. bularning hemmisini mawritaniyelik qérindashlirimizning xizmitige sunushni xalaymiz. aldimizdiki künlerde birleshme iqtisad komitétining tunji yighinini achimiz. bügün ikki dölet otturisida sayahetchiliktin yéza igilikigiche, iqtisadtin kanchiliqqiche her xil kélishimler imzalandi, bu kélishimler mewjut hazirqi munasiwetlirimizge téximu küch béghishlaydu.»

jumhur reis rejep tayyip erdoghan türk hawa yolliri shirkitining nowakshot seperlirini bashlishining iqtisadiy munasiwetlerde yetken sewiyeni körsitip béridighanliqini alahide tekitlidi.

u mudapie sanaiti sahesidiki tejribelernimu mawritaniyelikler bilen ortaqlishishni xalaydighanliqini eskertip, mundaq dédi:

«türkiye bu menidin éytqanda, intayin muhim tereqqiyatlarni emelge ashurdi. sahil döletliri duch kelgen térrorluq tehditini eng yaxshi chüshinidighan döletlerning béshida türkiye bar. ötken hepte hörmetlik mawritaniye pirézidéntining tirishchanliqi bilen teshkil qilinghan G5 sahil ortaq küchige 5 milyon dollar yardem qilidighanliqimizni élan qilduq.»

u 2016-yildiki 15-iyul türkiyening fethullahchi térrorluq teshkilatining peskeshlerche qilghan herbiy özgirish qozghashqa urunush herikitige duch kelgenlikini xatirilitip: «15-iyul biz üchün éytqanda, oxshash waqitta heqiqiy dostlirimiz otturigha chiqqan kéchidur. men hörmetlik mawritaniye pirézidéntigha dölitimiz bilen qilghan hemkarliqi seweblik tekrar teshekkürlirimni sunimen, buningdin bashqa mawritaniye idare-organlirigha fethullahchi térrorluq teshkilatigha qarshi küreshte bizni qollighanliqi üchün teshekkür éytimen» dédi.

u: «mawritaniyediki fethullahchi térrorluq teshkilatining mektepliri maarip wexpimizge ötküzüp bérildi, wexpimizning mawritaniyede xeyrilik xizmetlerni mawritaniye milliy maarip ministirliqi bilen birlikte royapqa chiqiridighanliqidin gumanlanmaymen» dédi.

u quddus toghrisidimu toxtaldi we bu sheherning oxshash waqitta xiristiyan dunyasi üchünmu muhim jay ikenlikini eskertti.

u quddus toghrisida mundaq dédi:

«amérikaning quddusta elchixana achidighanliqini élan qilishi, biz bilen héchqandaq munasiwiti yoq, quddus toghrisidiki meydanimizdin hergizmu waz kechmeymiz, quddus pelestinning paytextidur, buni alliburun élan qilduq.»

jumhur reis rejep tayyip erdoghan gherbiy afriqa ziyaritining ikkinchi békiti bolghan mawritaniyede uchrishishlirini axirlashturup, sénégalgha qarap yolgha chiqti.