түркийә, нетанйаһуниң түркийә вә әрдоған тоғрисидики сөзлиригә қаттиқ рәддийә қайтурди
җумһур рәислик сарийи байанатчиси ибраһим қалин, «исраилийә баш министири нетанйаһуниң түркийә җумһурийити вә һөрмәтлик җумһур рәисимиз тоғрисидики байанатлирини әң еғир шәкилдә әйибләймиз» деди.
түркийә авази радийоси хәвири: җумһур рәислик сарийи байанатчиси ибраһим қалин йазма байанат елан қилип, исраилийә баш министири бунйамин нетанйаһуниң түркийә җумһурийити вә җумһур рәиси рәҗәп таййип әрдоғанға алақидар байанатлирини әң еғир шәкилдә әйибләйдиғанлиқлирини билдүрди.
«хәлқара қанун – түзүмләрни дәпсәндә қилған, пәләстин хәлқиниң йүзләрчә йиллиқ вәтән земинлирини ишғал қиливалған, б д т һөҗҗәтлирини системилиқ һалда дәпсәндә қилип келиватқан исраилийәниң, алди билән өз қилмишлириниң һесабини бериши керәклики» ни тәкитлигән байанатчи ибраһим қалин, сөзини давамлаштуруп, «миңларчә бигунаһ пәләстинликни қәтл қилған, пәләстинликләрниң земинлирини үсти очуқ түрмигә айландурған бир аңниң, җавабкарлиқ туйғусини йошуруш үчүн оттуриға қойған дәва вә әйибләшләргә әстайидил қараш мумкин әмәс. тунҗи қиблимиз болған қуддусни <бир қетимлиқ иш пүтти> билән ишғалчи дөләтниң пайтәхти қилимиз, дәп ойлиғанлар, вақтини зайә қилмақта. исраилийәлик әмәлдарлар дөлитимизгә вә рәһбиримизгә һуҗум қилишниң орниға пәләстин земинлирини ишғал қилишқа хатимә бериши лазим. түркийә җумһурийити дунйаниң һәрқандақ йеридикигә охшаш пәләстиндиму һәқниң, һоқуқниң вә зулумға учриғучиларниң сепидә турушни давамлаштуриду» дегәнләрни қәйт қилди.
