әрдоған имам - хәтиб оқуғучилирини риқабәткә чақириқ қилди

түркийә авази радийоси хәвири: җумһур рәис рәҗәп таййип әрдоған имам - хәтиб тулуқ оттура мәктипини пүткүзгән оқуғучиларниң илим – ирпанда риқабәткә чүшүшини тәләп қилди. 

җумһур рәис рәҗәп таййип әрдоған қасимпашадики тәнтәрбийә залида өндәр имам - хәтиб тулуқ оттура мәктипини пүттүргәнләр җәмийити тәрипидин өткүзүлгән оқуш пүттүрүш мурасимида нутуқ сөзлиди.

әрдоған нутуқида, «тәңсиз өлчәмләр әмәлдин қалдурулған мана әмдики чағда, халиған киши, халиған мәктипигә, халиғини бойичә бараламду – йоқ? имам - хәтиб тулуқ оттура мәктпини пүткүзгән оқуғучилардин йуқири утуқларни күтиватимән. риқабәтчи болушиңлар лазим. илим – ирпанда риқабәткә чүшүшиңларни халаймән. шуңа силәрниң тиришчанлиқлириңларға алаһидә әһмийәт беримән. шуни әстин чиқармаслиқиңлар лазимки, силәрниң утуқлириңлар бизниң иптихарлиниш вәсилимиздур» деди.

әрдоған йәнә «террорлуқ, наһәқчилик, қанунсизлиқ, адаләтсизлик, зораванлиқ җүмлидин қанунлуқ һесабланмайдиған һеч бир ишниң йенида имам - хәтиб тулуқ оттура мәктипини пүткүзгән оқуғучилар болмайду. шуңа фәтһуллаһчи террорлуқ тәшкилатиға охшаш қара гуруһлар, дәвримизниң һашһашилири, бу муқәддәс мәктәпкә сеңип керишкә вә суйиестимал қилишқа йәр тапалмиди» деди.