türkiye amérika yéngi hökümitige sezgür mesililirini chüshendürüshke tirishmaqta

türkiye awazi radiyosi xewiri: tashqi ishlar meslihetchisi ümit yalchin mushu heptining béshida washingtonda amérika tashqi ishlar ministirliqi, dölet mudapie ministirliqi we dölet xewpsizlik kéngishidiki mesul emeldarlar bilen körüshti. uning uchrishishlirida, térrorluq teshkilati p k k ning süriyediki gumashtisi p y d bilen bolghan munasiwetliri we fethullahchi térrorluq teshkilatining kattibéshi fethullah gülenni qayturushni öz ichige alghan türkiye-amérika munasiwetlirige chétlidighan nurghunlighan mesililer küntertipke keldi.

u amérikidiki uchrishishliri üstide toxtaldi we «intayin ünümlük bolghanliqi» ni eskertti.

tashqi ishlar ministirliqi meslihetchisi ümit yalchinning amérika ziyariti, pat arida emelge ashurush pilan qilinghan yuqiri derijilik ziyaretlerning teyyarliqi bolush xususiyitige ige, dep qaralmaqta.

igilinishiche, ümit yalchin uchrishishlarda, munasiwetlik dairilerge enqerening térrorluq teshkilati p k k ning süriyediki gumashtisi p y d we y p g ni amérika yéngi hökümitining qollimasliqini we fethullah gülenning qayturulushi musapisining ehmiyiti toghrisidiki meydanini yetküzgen. bulardin bashqa, süriyede bixeterlik rayoni qurush qatarliq ikki terep munasiwetlirige munasiwetlik nurghunlighan mesililer muhakime qilinghan.

jumhur reislik külliyesining muawin bash katipi we bayanatchi ibrahim kalin ötken hepte bir téléwiziye pirogrammisida qilghan sözide, amérikiliq mesul emeldarlar bilen mezkur mesililerni sözlishishni dawamlashturidighanliqlirini eskertip, meslihetchi ümit yalchinning amérikigha baridighanliqini uqturghan idi.