түркийә рәһбәрлири җумһурийәт байрими тәбрикнамилирида муһим нуқтилар үстидә тохталди

түркийә авази радийоси хәвири: җумһур рәис рәҗәп таййип әрдоған 29 – өктәбир түркийә җумһурийити қурулғанлиқиниң 93 - йили мунасивити билән елан қилған тәбрикнамисида: «түркийә җумһурийитимизни, 2200 йиллиқ дөләт әнәнимиз билән раваҗландурған районлиримиздики 1000 йиллиқ сәлҗуқийлар вә османли мирасиниң әйни чағдики қейин шараитлар астида қолға кәлтүргән утуқи дәп қараймиз. түркийә җумһурийити 93 йилдин буйан дуч кәлгән қейинчилиқларни йеңип, йолини давамлаштурмақта. болупму йеқинқи мәзгилдики илгириләшлири сайисида бүгүнки дунйаниң йүксәлгән күчлири арисидин орун елишта утуққа еришкән бир дөләткә айланди. түркийә барғансири йүксиливатқан иқтисади, күчлүк демократийәси, түпки инсанпәрвәлик қиммәт қарашлирини мәһкәм тутуши, пиринспал вә йирақ көрәр, ғайилик ташқи сийасити билән районда вә хәлқарада илһам мәнбәси болушни бүгүнки күндиму давамлаштурмақта» деди. бирлик вә баравәрликниң муһимлиқи үстидиму тохтилип, «бирликимизгә баравәрликимизгә, қериндашлиқимизға, вәтинимиз, истиқлалимиз вә истиқбалимизға қәст қилмақчи болған һечқандақ һуҗум ғәлибигә еришәлмәйду» дегәнләрни әскәртти. 

түркийәниң һәрқандақ чағдикидин күчлүк вә қәтий ирадилик икәнликини тәкитләп, «террорлуқ тәшкилатлирини суйистемал қиливатқанлар нишанимизға йетишимизгә һәргиз тосқунлуқ қилалмайду» деди.

түркийә бүйүк милләт мәҗлиси (парламенти) башлиқи исмаил қәһриман түркийә җумһурийити қурулғанлиқиниң 93 – йили мунасивити билән елан қилған тәбрикнамисида, «1923 – йили 29 – өктәбирдә елан қилинған җумһурийиимизниң 93 – йилиға қәдәм қойдуқ. миллитимизгә қутлуқ болсун» дегән сөзләрни шиләтти. империйалист дөләтләрниң пиланлирини түрк миллитиниң қәтий ирадиси бузуп ташлиғанлиқини билдүрүп, «дәвр бөлгүч қәдәмлиримиз билән һөррийитимиз вә мутәқиллиқимизни техиму мәстәһкәмлидуқ» деди.

баш министир бинали йилдиримму түркийә җумһурийити қурулғанлиқиниң 93 – йили мунасивити билән елан қилған тәбрикнамисида, дөләт асасий қанунини өзгәртишниң әһмийити үстидә тохталди.

йеңи дөләт асасий қануниниң җумһурийәтниң түп асаслирини техиму мәстәһкәм, техиму тәврәнмәс һалға кәлтүридиғанлиқини тәкитләп, қанунниң үстүнликидә қәтий мадара қилмайдиған, сийасий система сүпитидә пирезидентлиқ системисини өзләштүргән вә әркинликни йақилайдиған бир йеңи дөләт асасий қануни билән йолни давамлаштуридиғанлиқини ейтти.