түркийә YPG ни ахирқи қетим агаһландурди

түркийә авази радийоси хәвири: ташқи ишлар министири мәвлүт чавушоғлу, YPG террорчилири вақтида фират дәрйасиниң шәрқигә чекинмигән тәқдирдә, һуҗум нишаниға айлинидиғанлиқини ейтти.

чавушоғлу әнқәрәдә дөләт ишлири зийаритидә болуватқан голландийә ташқи ишлар министири берт коендерс билән өткүзгән қошма мухбирларни күтүвелиш йиғинида, 24 – авғустта башланған ‹фират қалқини һәрикити› ниң җәраблусни даеш террорлуқ тәшкилатидин тазилашни нишан қилғанлиқини хатирилитип өтти.

мәвлүт чавушоғлу, «кичиккинә күч билән даеш контрол қиливатқан җайларни тәрк қилмақта, у йәрләрдин қачмақта. (даешқа қарши бирләшмә ичидики) 5-6 дөләт болсиму бу җәһәттә һәмкарлиқ орнатқан болса иди, һазирғичә сүрийә вә ирақта бундақ бир террорлуқ тәшкилати қалмиған болатти» деди.

һәрбий һәрикәт давамлишиватқан мимбиҗ районида асаслиқи әрәбләрниң йашайдиғанлиқини вә түркийә қоллаватқан бу һәрикәтниң ичидики күчләрниңму асасән бу районниң хәлқи икәнликини тәкитлигән чавушоғлу, «бу районларға бу йәрни ташлап кетишкә мәҗбур болуп қалған кишиләр орунлаштурулуши, улар йашиши керәк. лекин, YPG ниң ғәризи бу әмәс. YPG барған йәрлиридики өзлиридәк ойлимайдиған кордларни өз ичигә барлиқ кишиләрни көчүшкә мәҗбурлимақта, ентик тазилаш елип бармақта. асасән бу һәрбий һәрикәтләрдин PKK/PYD/YPG қатарлиқларниң биарам болушиниң сәвәби будур. даешқа қарши уруш қиливатқанлиқини дәватқан бир террорлуқ тәшкилати, башқа күчләрниң даешқа қарши елип бериватқан һәрикитидин немишқа биарамлиқ һес қилиду? ортақ нишан даеш болған икән, немишқа биарам болиду?» дегән соалларни қойди.

террорлуқ тәшкилати YPG ниң һәм өзи һәм вашингтон даирилири вәдә қилғандәк, вақтида фират дәрйасиниң ғәрбидин чекиниши керәкликини тәкитлигән министир чавушоғлу, «әксичә болғанда, нишанға айлиниду» деди.

мәвлүт чавушоғлу, адана инҗирлик һәрбий базисида турушлуқ әскәрлирини зийарәт қилмақчи болған германийә парламент әзалири билән мунасивәтлик бир соалға «керәклик қәдәмләр ташланса, рухсәт қилимиз, болмиса, әйибкә буйримисун» дәп җаваб қайтурди.

түркийә, 1915 – йил вәқәлири ийун ейида германийә парламентида «ирқий қирғинчлиқ» дәп қаралғандин буйан, бу дөләт парламент әзалириниң инҗирлик һава армийә базисиға киришигә рухсәт беришни рәт қилмақта.