«fethullah gülen türkiyege kélip hésab béridu»
bash ministir yildirim fethullahchi térrorluq teshkilatining kattiwéshi fethullah gülenning türkiyege kélip hésab béridighanliqini éytti.
türkiye awazi radiyosi xewiri: yildirim jumhur reislik sariyining aldida ötküzülgen «démokratiyeni qoghdash» yighilishida qilghan sözide, türkiyening fethullahchi térrorluq teshkilati unsurlirining 15 – iyul herbiy isyan urunushida xewpning bosughusidin qaytqanliqini eskertti, fethullahchi térrorluq teshkilatining kattiwéshi fethullah gülenni öz ichige alghan barliq jawabkarlarning eng éghir jazagha tartilidighanliqini qeyt qildi, türkiye xelqining herbiy isyan urunushidin kéyin ayan bolghan ammiwi haldiki wetenni, démokratiyeni qoghdash yolida héchnémidin ayanmasliqtek mislisiz weten söygüsi, sadaqiti we her jehettiki gheyret – shijaitining pütkül jahanni hang – tang qaldurghanliqini tekitlep mundaq dédi: «15 – iyul küni wetenni qoghdash yolida hayatini teqdim qilghan shéhitlirimizning sayisida wetinimizni qoghdap qalduq. bu arqiliq biz tengdashsiz bir millet ikenlikimizni pütkül dunyagha körsitip qoyduq. jumhur reislik sariyida jumhur reis erdoghanning huzurida axirqi qétimliq démokratiyeni qoghdash yighilishi ötküzülüwatidu. 15 – iyul kéchisi eziz xelqimizge chaqiriq qilip, wetenni qoghdash kürishige rehberlik qilghanliqi üchün jumhur reismiz erdoghan aliylirigha köptin köp rehmet éytimen. eziz xelqimiz türkiyening kélechikini, ay yultuzluq bayriqimizni namerdlerning ayagh asti qilishigha yol qoymidi, weten xainlirining musteqilliq urushimizgha rehberlik qilghan ghazi parlaméntigha basturup kirishige ruxset qilmidi, jumhur reisimizni we hökümitimizni esla yalghuz tashlap qoymidi, jumhur reislik sariyining ishghal qilinishigha pütün küchi bilen taqabil turdi.»
