30.11.2020
бүгүнки түркийә мәтбуатлиридин таллап тәййарлиған хәвәрлиримизниң қисқичә мәзмунлири төвәндикичә:
түркийә авази радийоси: «стар» гезити, «әрдоған дунйаға қуддус вә пәләстин тоғрисида хитаб қилди» сәрләвһилик хәвиридә, җумһур рәис рәҗәп таййип әрдоғанниң, түркийәниң барлиқ мунбәрләрдә пәләстин дәвасиға игә чиқип келиватқанлиқини, пәләстинләргә йүргүзүлүватқан ишғал, зулум вә қирғинчилиқ сийасәтлириниң ахирлишиши үчүн пүтүн күчи билән тиришчанлиқ көрситиватқанлиқини билдүрүп, «1967 – йилидики чегралар ичидә бирләшкән дөләтләр тәшкилати қарарлири вә әрәб тинчлиқ тәшәббуси асасида пайтәхти қуддус болған мустәқил, бир пүтүн вә игилик һоқуқлуқ пәләстин дөлити қурулғучә күришимизни қәтийлик билән давамлаштуримиз» дегәнликини оқурмәнлири билән ортақлашти.
«вәтән» гезити, «түркийәниң йәрлик ваксиниси, бионтек вә модерна билән охшаш алаһидиликкә игә» сәрләвһилик хәвиридә, түркийәдә тунҗи қетим ген техникисидин пайдилинип йасалған ковид – 19 ваксинисиниң сәлчуқ университети тиббий ген бөлүмидә тәрәққий қилдурулуватқанлиқи, ийун ейида башланған ваксина тәтқиқатиниң һайванларда тәҗрибә қилиниш басқучиға кәлгәнлики, бионтек вә модерна ширкәтлири тәтқиқ қилип йасап чиққан ваксиналар билән охшаш алаһидиликкә игә йәрлик ваксинаниң йаз айлирида инсанларниң истемалиға сунулидиғанлиқи тоғрисидики учурларға орун берилди.
«хабәртүрк» гезити, «1915 – йил чанаққәлә көврүки түврүклириниң егизлики ейфел мунаридин ешип кәтти» сәрләвһилик хәвиридә, чанаққәлә боғузиниң йавропа – асийа қирғақлирини өзара туташтуридиған 1915 – йил чанаққәлә көврүки түврүклириниң егизликиниң франсийәниң пайтәхти парижниң символи болған 300 метирлиқ ейффел мунаридин ешип кәткәнликини, қурулуш пүткүндин кейин дунйадики әң чоң оттура мусапилик асма көврүки унванини алидиған бу көврүкниң, пүткән түврүклириниң егизликиниң 318 метирға йәткәнликини қәйт қилди.
«һөррийәт» гезити, истанбул пай чеки базирида йеңи рекордлар йаритилмақта» сәрләвһилик хәвиридә, истанбул пай чеки базири индексиниң җумһур рәис рәҗәп таййип әрдоғанниң «иқтисадта йеңи дәвр башлиниду» дегән сөзлири билән тәң нойабир ейида уда төт һәптә бойичә өрлигәнлики вә өткән һәптә әң йуқири сәвийә рекортини арқа – арқидин бузуп ташлап, тарихиниң әң йуқири көрсәткүчи болған 1351 поинтқа йәткәнликини, мутәхәссисләрниң, истанбул пай чеки базиридики өрләшниң давамлишидиғанлиқини оттуриға қойғанлиқи тоғрисидики учурларни оқурмәнлириниң диққитигә сунди.
«йеңи шәпәқ» гезити, «тирилиш – әртуғрул телевизийә тийатири мусулманларниң тәсәввур күчини қайтидин йашнатти» сәрләвһилик хәвиридә, тирилиш – әртуғрул тилевизийә тийатириниң дунйа қаналлиридики тәсириниң ғулғула пәйда қилишни давамлаштуруватқанлиқи, 72 дөләттә тарқитиливатқан түркийә радийо – телевизийә идариси – т р т ниң мәшһур телевизийә тийатириниң пәләстинтин – пакистанғичә, асийадин африқичә болған нурғун җайларда кишиләрниң күндилик турмушиниң бир парчисиға айлинишқа мувәппәқ болғанлиқини, «оттура шәрқниң көзи» намлиқ тор бәттики бир мақалидә, мәзкур телевизийә тийатириниң дунйадики мусулманларниң тәсәввур күчини қайтидин йашнатқанлиқиниң оттуриға қойулғанлиқи қәйт қилинди.
