11.11.2020
bügünki türkiye gézitliride asasiy salmaqni igiligen xewerlirimiz töwendikiche:
türkiye awazi radiyosi: «‹xewer türk› géziti», «jumhur reis erdoghan muhim bayanatlarni berdi» serlewhilik xewiride, töwendiki uchurlarni oqurmenlirining diqqitige sundi:
jumhur reis rejep tayyip erdoghan, tünügün paytext enqerediki beshtepe xelq qurultiyi we medeniyet merkizide, atatürk medeniyet, til we tarix tetqiqatliri aliy orgini teripidin ötküzülgen mustapa kamal atatürk wapat bolghanliqining 82 - yilliqini xatirilesh murasimida qilghan sözide, iqtisadqa munasiwetlik muhim bayanatlarni bérish bilen bir waqitta, buningdin 100 yil ilgiri türkiyening mustapa kamal atatürk sayisida chet elliklerning imtiyazliq hoquqidin paydilinip döletni changgiligha kirgüzüwélish iskenjisidin qutulghanliqini, bügünki künde bolsa, zamaniwi kapitalgha qarshi küreshning dawamlishiwatqanliqini tekitlep mundaq dédi: «hazirghiche köpligen sahelerde dölitimizni ulughwar nishanlirigha yetküzginimizdek, iqtisadtimu dölitimizni iqtisadiy qurulmisi eng küchlük 10 dölet qatarigha kirgüzüsh nishanigha yétimiz. buning türkiye jumhuriyitining qurghuchisi ghazi mustapa kamal atatürkke qilinghan eng chong hediye bolidighanliqigha ishinimen.»
«‹höriyet› géziti», «ministir chawushoghlu ‹pashinyan axirida heqiqetni qobul qilishqa mejbur boldi› dédi» serlewhilik xewiride, munu uchurlargha orun ajratti:
dölitimiz tashqi ishlar ministiri mewlüt chawushoghlu, tünügün qirghizistan diplomatiye ministiri ruslan qazaqbaéw bilen ötküzgen qoshma axbarat élan qilish yighinida, erméniye – ezerbeyjan otturisida hasil qilinghan urush toxtitish kélishimi heqqide toxtilip mundaq dédi: «her qétim urush toxtitish kélishimige xilapliq qilghan, urushni teshebbus qilghan erméniye terep boldi. derweqe, erméniye buning üchün éghir bedel tölidi. tünügün kéche üch dölet otturisida urush toxtitish kélishimi imzalandi. buni qandaq közitish mesilisimu bar.»
«‹weten› géziti», «jumhur reislik sariyi bayanatchisi ibrahim qalin ezerbeyjan toghruluq bayanat élan qildi» serlewhilik xewiride, töwendiki uchurlarni oqurmenliri bilen ortaqlashti:
jumhur reislik sariyi bayanatchisi ibrahim qalin, ammiwi ortaqlishish tor béti Twitter sehipiside, ezerbeyjan bilen erméniye otturisida imzalanghan urush toxtitish kélishimi heqqide élan qilghan bayanatida, mundaq dédi: «qarabagh emdi azadtur. qarabagh ezerbeyjandur. türkiye buningdin kéyinmu hem sahede hemde söhbet üstilide herdaim ezerbeyjanning yénida bolidu.»
«‹sabah› géziti», «xulusi aqar ezerbeyjan heqqide bayanat élan qildi» serlewhilik xewiride, munu uchurlarni oqurmenlirining diqqitige sundi:
dölet mudapie ministiri xulusi aqar, ezerbeyjan bilen erméniye otturisida imzalanghan urush toxtitish kélishimi heqqide élan qilghan bayanatida, mundaq dédi: «texminen 30 yildin buyan ishghal astidiki zéminilirini qayturuwélish, erméniyening wehshiylerche hujumlirini axirlashturush yolida hiqqaniy rewishte küresh qilghan we bu küreshni mislisiz pidakarliqi netijiside zeper menzilgahigha yetküzgen ezerbeyjanliq türk qérindashlirimizning shanliq ghelibisini tebrikleymiz. imzalanghan urush toxtitish kélishimidiki shertlerning orundilishi, ishghal qiliwélinghan barliq zéminlarning ezerbeyjangha qayturulushi, rayonda tinchliq we muqimliqning qaytidin ishqa ashurulushi basquchidimu ezerbeyjanliq qérindashlirimiz bilen bir qelb bolushni dawamlashturimiz.»
«‹star› géziti», «türkiyedin xitaygha tunji qétim öy qushliri göshi we mehsulatliri éksport qilindi» serlewhilik xewiride, töwendiki bayanlargha orun ajratti:
yéza igilik we ormanchiliq ishliri ministiri bekir pakdemirli, dunyaning muhim importchiliridin bir bolghan xitay xelq jumhuriyitining ishiklirining türkiyening öy qushliri sahesige échiwétilgenlikini, 6-noyabirdin étibaren, öy qushliri göshi we mehsulatlirining xitaygha éksport qilinishqa bashlanghanliqini bildürdi.
