22.08.2019

türkiye awazi radiyosi: «hörriyet géziti», türkiye jumhur reislik sariyi bayanatchisi ibrahim kalin tünügün (21-awghust) échilghan ichki kabént yighinidin kéyin muhim bayanatlarni élan qilghanliqini xewer qildi.

ibrahim kalin süriyening idlib rayonida türkiye armiyesining aptomobil etritige qilinghan hujum üstide toxtilip: «naraziliqlirimizni rusiye terepke yetküzduq. aldimizdiki künlerde jumhur reis rejep tayyip erdoghan rusiye pirézidénti putin bilen téléfonda körüshidu. amérika pirézidénti donald tramp bilenmu bir téléfon söhbiti ötküzüsh üchün teyyarliq qiliwatimiz» dédi.

«xber türk géziti», türkiye dölet mudapie ministiri hulusi akarning amérika dölet mudapie ministiri mark éspér (Mark Esper) bilen téléfonda körüshkenlikini xewer qildi.

xewerde, hulusi akar bilen mark éspérning téléfon söhbitide, hulusi akarning süriyede firat deryasining sherqide tesis qilinishi pilan qilinghan bixeter rayongha munasiwetlik pikrini we ümidini bayan qilip, bixeter rayonni belgilengen asaslar dairiside waqitni ötküzüwetmestin tesis qilish kéreklikini bildürgenliki qeyt qilindi.

bilinishche, bixeter rayonning tesis qilinishigha munasiwetlik pilanning ikkinchi basquchi tünügün (21-awghust) tin tartip bashlanghan.

«star géziti», sanaet we téxnologiye ministiri mustafa warank türk meblegh salghuchilirigha tewe gérmaniyediki «Aquila» awiyatsiye shirkitining, türkiyede ayropilan zawuti qurushni pilan qiliwatqanliqini éytqanliqini xewer qildi.

ministir mustafa warank bu heqte mundaq dégen: «türk meblegh salghuchilirimizning dunyaning her qaysi jaylirigha meblegh sélishi we u yerlerde qolgha keltürgen paydisini türkiyege meblegh sélip ishlepchiqirishqa aylandurushi, sanaitimiz nuqtisidin éytqanda intayin muhim» dégen.

«Aquila» ayropilan zawutida ishlepchiqirilghan ikki kishilik meshiq ayropilani bu yil (2019) gérmaniyede eng yaxshi layihe mukapatigha érishken idi.

«yéngi shepeq géziti», türkiyege kelgen sayahetchilerning bu yilning deslepki yette éyida qilghan sodiliqining ötken yil (2018) ning oxshash mezgilidikige sélishturulghanda texminen %70 ashqanliqini xewer eqildi.

xewerde, qatar sayahetchilirining qilghan sodiliqining otturiche 6 ming 782 liraliq hejim bilen birinche rette, ereb birleshme xelipiliki sayahetchilirining qilghan sodiliqining 6 ming 441 liraliq hejim bilen ikkinchi rette, gérmaniyelik sayahetchilerning qilghan sodiliqining 5 ming 412 liraliq hejim bilen üchinchi rette turghanliqi qeyt qilindi.

«weten géziti», xitayning enqerede turushluq bash elchisi déng lining türkiye bilen xitay otturisidiki mermer sodisining ehmiyiti üstide toxtalghanda, ötken yili (2018) türkiyedin xitaygha 5 milyon tonna mermer éksport qilinghanliqini bildürgenlikini xewer qildi.

xewerde, déng lining türkiye mermer éksportida, %50 mermerning xitaygha éksport qiliniwatqanliqini, bu sewebtin ikki dölet arisida muqim hemde uzun muddetke sozulghan munasiwetlerning barliqini bildürgenliki qeyt qilindi.