30.04.2024

türkiye awazi radiyosi: «‹sabah› géziti», dölitimiz (türkiye jumhuriyiti) jumhur reisi rejep tayyip erdoghanning jiddiy ehwallargha taqabil turush qomandanliq merkizide ötküzülgen bir murasimda qilghan munu sözlirini neqil keltürdi:

«nopusining % 71 ti yer tewresh xewpi yuqiri jaylarda yashaydighan türkiyege nisbeten sheherlerni özgertish qurulushi xizmiti tallash emes, eksiche éhtiyajtur, mejburiyettur.»

«‹hörriyet› géziti», türkiye milliy istixbarat idarisining iraqning shimalidiki haquruq rayonida yéqinqi bir hepte ichide élip barghan zerbe bérish heriketliri dawamida, bölgünchi térrorluq teshkilati p k k/y p g ezasi 15 térrorchining  bir terep qilinghanliqini xewer qildi.

«‹yéngi shepeq› géziti», énérgiye we tebiiy bayliqlar ministiri alparslan bayraqtarning, sakarya tebiiy gaz saheside her küni 4 milyon 500 ming kub métir gaz ishlepchiqiriliwatqanliqini, buning 1 milyon 800 ming ailining éhtiyajini qanduralaydighanliqini bayan qilghanliqini yazdi.

«‹sitar› géziti», türkiye jumhuriyiti xezine we maliye ministiri mehmet shimshekning, islam tereqqiyat bankisi guruhining 2024- 2026-yilliq istratégiyesi dairiside türkiyediki layihelerni 6 milyard 300 milyon dollarliq meblegh bilen teminleydighanliqini bayan qilip mundaq dégenlikini oqurmenlirining diqqitige sundi:

 «biz nöwette yolgha qoyuwatqan iqtisadiy pirogramma sayisida chet el pul muamile apparatlirining türkiyege meblegh sélishi üzlüksiz dawamlashmaqta.»

«‹weten› géziti», «türkiye hawa yolliri shirkiti 21 – maydin bashlap afghanistangha hawa qatnishini eslige keltüridu» serlewhilik xewiride, töwendiki uchurlarni oqurmenlirining diqqitige sundi:

2021 – yili afghanistangha hawa qatnishini toxtatqan  türkiye hawa yolliri shirkiti bu döletke 21 – maydin bashlap ayropilan seperlirini qayta ishqa kirishtüridu.

türkiye hawa yolliri shirkitining ayropilan seperliri istanbul-kabul ariliqida seyshenbe, charshenbe, jüme we yekshenbe künliri heptide töt qétim yolgha qoyulidu.