03.10.2018

түркийә авази радийоси: «сабаһ гезити», түркийә җумһур рәиси рәҗәп таййип әрдоған идлибтә бәшшар әсәд һакимийити билән өктичиләр арисидики бихәтәр район сайисида чоң қәтлиам вә түркийәгә көч долқуниниң алди елинғанлиқини ейтқанлиқини хәвәр қилди.

гезитниң хәвиридә, рәҗәп таййип әрдоғанниң адаләт вә тәрәққийат партийәсиниң түркийә бүйүк милләт мәҗлиси (парламенти) дә өткүзүлгән гуруппа йиғинида: «фират дәрйасиниң шәрқидә терроризмниң ишғалини ахирлаштуруш ирадимиз қәтий» дегәнлики қәйт қилинди.

«йеңи шәпәқ гезити», түркийә ташқи ишлар министири мәвлүт чавушоғлу шивейтсарийәдә өткүзүлгән ғәрбий балқанлар истратегийәлик дийалог рәһбәрләр йиғинидин кейин, күнтәртип һәққидә байанат елан қилғанлиқини хәвәр қилди.

гезитниң хәвиридә, мәвлүт чавушоғлуниң: «мунбичтин й п г ни пүтүнләй чиқиришниң вә мунбични йәрлик хәлқләргә тапшуруп беришниң, һөкүмәт нуқтисидин шундақла хәвпсизлик нуқтисидин ейтқандиму аллибурун вақти келип өтүп кәтти» дегәнлики билдүрүлди.

хәвәрдә, мәвлүт чавушоғлуниң йәнә, келишимни америка билән сөзму сөз иҗра қилиш керәкликини әскәртип: «улар сәвәб болған кечикиш оттуриға чиқти, бирақ пүтүнләй йаман болуватиду йаки иҗра қилинмайватиду дейәлмәймиз» дегәнлики қәйт қилинди.

«һөррийәт гезити», түркийәниң тунҗи қетим русийәдин рубли билән буғдай сетивалидиғанлиқини елан қилди.

хәвәрдә, мәркизий русийәгә қайлашқан совекон (SovEkon) анализ мәркизи байанат елан қилип, түркийәниң русийәдин рубли билән тоннисини 17 миң рублидин 30 миң тонна йуқири протенлиқ буғдай сетивалидиғанлиқини билдүргәнлики қәйт қилинди.

совекон анализ мәркизи тәрәпләрниң миллий пул бирликлири билән қилған содиси сайисида вә пул обротлири сәвәби билән тартидиған зийанниң азийидиғанлиқини әскәрткән.

«вәтән гезити», иран-түркийә чеграсида 144 километир узунлуқта йасилидиған тамниң 88 километирлиқ қисминиң пүткәнликини хәвәр қилди.

гезитниң хәвиридә көрситилишичә, дунйадики үчинчи узун там һесаблинидиған «түрк сәдди» ниң бәзи җайлардики егизлики үч метирға йетидикән. қурулуш пүткәндин кейин, көзитиш мунарлири, камера системилири, һәрбий аптомобилларниң чарлиши үчүн «бихәтәр йол» йасилидикән.

«стар гезити», җумһур рәислик симфонийә оркестир әтритиниң 4-5-өктәбир күнлири «тройадин чанаққәләгичә» намлиқ дунйаға даңлиқ әсәрләр билән 2018-2019-йиллиқ консерт пәслини башлайдиғанлиқини хәвәр қилди.

хәвәрдә қәйт қилинишичә, 4-5-өктәбир күнлири тунҗи қетим һасан учарсуниң «тройадин чанаққәләгичә» дегән әсири 2018-2019-йиллиқ консерт пәслидә сәтәтхумарлар билән йүз көрүшидикән.

тройаниң б д т маарип, билим вә мәдәнийәт тәшкилати-йунеско (UNESCO) ниң дунйа мәдәнийәт тизимликигә киргүзүлгәнликиниң 20-йиллиқида, мәдәнийәт вә сайаһәт ишлири министирлиқи 2018-йилини «тройа йили» дәп елан қилиши мунасивити билән, «тройадин чанаққәләгичә» дегән әсәр җумһур рәислик симфонийә музика әтрити тәрипидин орунлинидикән. әсәрниң текисти түрк шаири мәһмәт акиф әрсойниң «чанаққәлә шеһитлириға» дегән шеири асас қилинған һалда түзүлгән.