қазақистан - түркийә оттурисидики истратегийәлик мунасивәтләр үзлүксиз тәрәққий қилмақта
қазақистан пирезиденти қасим җомәрт токайев икки дөләтниң йеқин вә қериндаш дөләтләр икәнликини тәкитләп, «биз түркийә билән истратегийәлик мунасивәтни тәрәққий қилдурушни давамлаштуримиз» деди.
түркийә авази радийоси хәвири: қасим җомәрт токайев һәр қайси йиғинларға қатнишиш үчүн дөлитидә зийарәттә болуватқан җумһур рәис әрдоған билән пирезидентлиқ сарийи акордада көрүшкәндин кейин өткүзүлгән бирләшмә ахбарат елан қилиш йиғинида сөз қилип, түрк дунйасиниң ата йурти болған қазақистанда әрдоғанни қарши алғанлиқидин мәмнун болғанлиқини билдүрди.
җомәрт токайев: «бу зийарәт шүбһисизки қазақистан-түркийә мунасивитини күчәйтиду» деди.
җомәрт токайев бу йил икки дөләт оттурисида дипломатик мунасивәт орнитилғанлиқиниң 30 - йиллиқини тәбриклигәнликини вә бу мәзгилдә икки дөләт оттурсида йеқин сийасий дийалог, өз-ара һөрмәт вә ишәнчни асас қилған дөләт мунасивәтлирини тәрәққий қилдурғанлиқини тәкитлиди.
токайеф май ейида пайтәхт әнқәрәдә елип барған рәсмий зийарити нәтиҗисидә җумһур рәис әрдоған билән «кеңәйтилгән истратегийәлик һәмкарлиқ» байаннамиси имзалиғанлиқини әскәртип, икки дөләтниң йеқин вә қериндаш дөләт икәнликини билдүрди.
җомәрт токайев: «биз түркийә билән истратегийәлик мунасивәтни давамлиқ тәрәққий қилдуримиз. икки дөләтниң хәлқаралиқ мәсилиләрдә тутқан позитсийиси йеқин. бу интайин муһим. биз хәлқаралиқ вә район характерлиқ сәвийәдә қойуқ һәмкарлиқимизни даәвамлаштурушқа келиштуқ» деди.
