әлийев «баку азад қилинғанлиқиниң 102 – йиллиқи» мунасивити билән әрдоғанға мәктуп йоллиди

түркийә авази радийоси хәвири: әзәрбәйҗанниң пайтәхти бакуниң кавказ ислам армийәси тәрипидин әрмәни вә болшевик шайкилиридин азад қилинғанлиқиниң 102 – йиллиқи түрлүк паалийәтләр арқилиқ тәбрикләнмәктә.

баку түрк шеһитгаһлиқида өткүзүлгән мурасимға, түркийәниң баку әлчиси әркан өзорал, һәрбий ишлар мәслиһәтчиси  биригада командири исмаил һаққи көсәали вә әзәрбәйҗан һәрбий даирилири қатнашти.

өзоралниң шеһитгаһлиққа гүлчәмбирәк қойуши билән башланған мурасимда, шеһитлар үчүн һөрмәттә турулди.

әзәрбәйҗан дөләт мудапиә министирлиқи намидинму һәрбий ишлар академийәсиниң башлиқи лейтенант генерал һәйдәр пирийеф шеһитгаһлиққа гүлчәмбирәк қойди.

шеһитгаһлиқ хатирә дәптирини имзалиған әлчи өзорал, кейинчә һәмраһлиқидики һәйәт билән бирликтә баку шеһитлар хийабаниниму зийарәт қилди.

әзәрбәйҗан пирезиденти илһам әлийев, бакуниң кавказ ислам армийәси тәрипидин әрмәни вә болшевик шайкилиридин азад қилинғанлиқиниң 102 – йиллиқини тәбрикләш мунасивити билән җумһур рәис рәҗәп таййип әрдоғанға мәктуп йоллиди.

әлийев мәктубида, қериндаш дөләт түркийәниң буниңдин 102 йил бурун түрлүк қийинчилиқларға қаримай әзәрбәйҗандин йардимини айимиғанлиқини, бакуни азад қилған нури паша қоманданлиқидики кавказ ислам армийәси шеһитлирини һәрдаим хатириләп келиватқанлирини әскәртиш билән бир вақитта, 15 – сентәбирниң әзәрбәйҗан хәлқи үчүн наһайити муһим бир күн икәнликини, чүнки бу күндә бакуниң азад қилинип, дөләтниң пайтәхти елан қилинғанлиқини тәкитләп мундақ деди: «бүгүнки күндә әзәрбәйҗан – түркийә қериндашлиқи вә достлуқи пүткүл дунйаға өлгидур. қериндаш дөләт түркийә, әрменийәниң әзәрбәйҗанға қарши 12 – ийул күнидики һәрбий иғвагәрчиликигә қарита қаттиқ позитсийә билдүрди. әзәрбәйҗан хәлқи товуздики вәқәләр тлқ  алақидар очуқ – ашкара байанатлириңизға чәксиз миннәтдарлиқ билдүриду. әзәрбәйҗанму һәрдаим қериндаш дөләт түркийәниң йенидидур, һәмдә барлиқ мәсилиләрдә қилчә иккиләнмәстин қоллайдиғанлиқини намайән қилмақта. әзәрбәйҗан – түркийә истиратегийәлик иттипақдашлиқ  вә һәмраһлиқ мунасивити районда тинчлиқ вә бихәтәрликниң ишқа ашурулуши һәм һәмкарлиқниң йәниму күчәйтилишигә төһпә қошуватқан муһим амилдур.»

бакуни азад қилиш күриши җәрйанида кавказ ислам армийәсиниң 1130 әскири шеһит болғаниди.

игилинишичә, әзәрбәйҗанниң баку, шәки, шамаһи, гобустан, гөйчай, күрдәмир, нәфчала, һаҗиқабул вә губа қатарлиқ көплигән районлирида, кавказ ислам армийәси әскәрлири дәпнә қилинған 14 түрк шеһитгаһлиқи бар икән.