аһиска түрклири өй - маканлирини тәрк әтмәктә

түркийә авази радийоси хәвири: аһиска түрклири өй - маканлирини тәрк әтмәктә.
украинаниң шәрқидики һөкүмәт күчлири билән руспәрәс бөлгүнчи гуруппилар оттурисидики тоқунушлар түпәйли районда йашаватқан 700 гә йеқин аһиска түрклири өй - маканлирини тәрк етишкә мәҗбур болди.
аһиска түрклири вәтән җәмийити донетсик вәкили нәбиҗан басатов, силавйанискта йашашниң наһайити хәвплик болуп қалғанлиқини, шу вәҗидин аһиска түрклириниму өз ичигә алған көп сандики кишиләрниң өй - маканлирини тәрк етип, бихәтәр районларға көчүп кәткәнликини ейтти.
басатов, «һазирғичә силавйанискта йашап кәлгән 700 гә йеқин аһиска түрклири өй - маканлиридин айрилишқа мәҗбур болди. буларниң көп қисми һерсон, русийәдики ростов вә әзәрбәйҗанға көчүп кәтти» деди.
басатов, иқтисадий қийинчилиқ түпәйли бихәтәр җайларға көчүп кетәлмигәнликлири үчүн, силавйанискта йашаватқан нурғунлиған аһиска түрклириниң йәр асти өйлиридә қеливатқанлиқини әскәртти.
силавйанискта тоқунушларниң күнсери әвҗ елип кетиватқанлиқини қәйт қилған басатов, «өй - маканлирини тәрк етип, бихәтәр җайларға көчүп кәткән аһиска түрклириму әң көп болғанда 1 - 2 ай туралиши мумкин, 1 - 2 - айдин кейин қайтишқа мәҗбур болуп қалиду. бу йәрдики тоқунушлар болса пат йеқинда бесиқидиғандәк қилмайду» деди.