түркий тилда сөзлишидиған дөләтләр йиғини чақирилиду

түркийә авази радийоси хәвири: түркий тилда сөзлишидиған дөләтләр йиғини, җумһур рәис абдуллаһ гүлниң саһибханилиқида 4 - ийун күни бодрумда ишқа ашурулиду.
түркийә, әзәрбәйҗан, қирғизистан вә қазақистан тәрипидин өткүзүлүватқан йиғинға, бу йил түркмәнистанму иштирак қилиду. өзбекистанниң болса кейинки басқучта иштирак қилиши мөлчәрләнмәктә. алди билән вашингитон, берлин вә парижда тәшкил қилиниши пиланлиниватқан диаспора районлуқ мәркәзләр билән дунйада йашаватқан түркләр бир йәргә җәм қилиниду. бу арқилиқ ортақ паалийәт елип берип, әрменийә мәсилисигә охшиған муһим мәсилиләрдә җамаәт пикри топлаш нишан қилинмақта. вақитниң өтүшигә әгишип, түрк диаспораси тоғрулуқ нопус тәкшүрүш елип берилиши пиланланмақта. түрк кеңиши баш катипи хәлил ақинҗи, дунйаниң һәрқайси җайлирида йашаватқан түркләрниң наһайити көп икәнликини, бу арқилиқ наһайити зор мувәппәқийәтләрни қолға кәлтүргили болидиғанлиқини тәкитлиди.
дипломатийә мухбирлири җәмийити әзалириға хитаб қилған ақинҗи, түрк диаспорасиниң нопузиниң нопусичилик тәсир күчкә игә әмәсликини әскәртип мундақ деди: «бирлишип, ортақ һәрикәт қилғинимизда, нопузимиз техиму күчийиду, бу арқилиқ ортақ мәнпәәтлиримизниму қоғдийалаймиз.»
«ортақ тарихий әсәрләр» лайиһәси болса, йашларда ортақ мәдәнийәт вә ортақ өтмүш еңини йетилдүрүшни мәқсәт қилмақта. келәр йилдин башлап, түркий тилда сөзлишидиған дөләтләрдики башланғуч вә оттура мәктәпләрдә ортақ тарих дәрсликлири оқутулиду.
йиғинда бихәтәрлик мәсилилириму музакирә қилиниду.
сайаһәт лайиһәсиму йиғинниң муһим күнтәртип маддилиридин бири.
игилинишичә, ортақ җуғрапийәниң айрилмас бир қисми болған тарихий йипәк йоли лайиһәси арқилиқ йипәк йолини һәм район һәмдә дунйаға нисбәтән җәзбидарлиқ мәркәзгә айландуруш нишан қилинмақта.