hindistanliq déngizchi hindi okyanda qutquzushni kütmekte
2018-yil 1-iyul firansiyedin bashlanghan altun shar yelkenlik qolwaqta yer sharini aylinish musabiqiside yarilanghan hindistanliq déngizchi abhilash tomining awstiraliyedin 3200 kilométir yiraqliqta qutquzushni kütüp turuwatqanliqi xewer qilindi.
türkiye awazi radiyosi xewiri: jüme küni (21-séntebir) altun shar yelkenlik qolwaq musabiqisi jeryanida hindi okyanda yarilanghan hindistanliq déngizchi abhilash tomi hazirghiche qutquzushni kütmekte.
awstiraliye téléwiziyesining xewiride bildürülishiche, qutquzush xadimliri qolwaq tüwrükining boranda sunup ketkenliki sewebidin bel qismidin éghir yarilanghan we awstiraliyedin 3200 kilométir yiraqliqta qutquzushni kütüp turuwatqan 39 yashliq tomini qutquzushqa tirishmaqta iken.
awstiraliye déngizchiliq bixeterliki idarisining qutquzush we izdesh ishliri mudiri alan lloyd firansiyening tekshürüsh paraxoti osiris (Osiris) ning bügün (24-séntebir) qolwaq bar jaygha yétip baridighanliqini we déngizchining ehwali heqqide cheklik melumatqa ige ikenlikini uqturdi.
qutquzush xadimliri hindistanliq déngizchining musabiqini uyushturghanlargha éghir yarilanghanliqi we yémek yiyish üchünmu heriket qilalmighanliqi uchurini yetküzgendin kéyin, derhal heriketke ötken.
hindistan déngiz armiyesi alahide qismining eskiri bolghan tomi süniy hemrah téléfonining boranda sunup kétishi sewebidin mesul xadimlargha uchur ewetip alaqe ornatqan. u uchurida: «mangalmaywatimen, qutquzushqa éhtiyajliq bolup qaldim, qolwaqta bixeter turuwatimen, süniy hemrah téléfonom ishlimeywatidu» dep yazghan.
hindistanliq déngizchining mangalmighanliqi üchün zapas süniy hemrah téléfonini ishlitelmigenliki perez qilindi.
awstiraliye we hindistan déngiz armiyelirining ikki ayropilani yekshenbe küni (23-séntebir) qolwaq bar jayda ehwalni közetken, biraq tomi bilen alaqe ornitalmighan.
altun shar yelkenlik qolwaq musabiqisi musapisining uzun we intayin qiyin bolushi sewebidin dunyadiki eng tes déngiz musabiqisi hésablinidu. yer sharini yalghuz, quruqluqqa ayaq basmay we xewerlishish üsküniliridin bashqa eslihelerni ishlitish cheklinidighan musabiqe, 1968-yildin tartip ötküzülüp kelmekte.
hindistanliq déngizchi abhilash tomi we oxshimighan döletlerdin kelgen 18 déngizchi qatnashqan musabiqe, 2018-yili 1-iyul firansiyening atlantik okyan sahilidiki lés sablés dolonné shehiridin bashlanghan.
musabiqige qatnashqan bashqa déngizchilar borangha duch kelmeslik üchün shimaldin mangghan.
