әрдоған водафон тәнтәрбийә мәйданиниң ечилишида лента кәсти

түркийә авази радийоси хәвири: җумһур рәис рәҗәп таййип әрдоған түркийәниң 13 йилда 659 қетим хәлқаралиқ тәнтәрбийә паалийәтлиригә саһибханлиқ қилип, бу саһәдики үстүнлүкини намайан қилғанлиқини ейтти. у истанбулда бәшикташ гимнастика кулубиниң «водафон тәнтәрбийә мәйдани» ниң ечилишиға қатнашти.

у охшимиған шәһәрләрдә йәнә 14 данә тәнтәрбийә мәйданиниң йасиливатқанлиқини, тоққуз тәнтәрбийә мәйданиға мунасивәтлик техника җәһәттики тәййарлиқларниң давамлишиватқанлиқини әскәртип, қисқа вақит ичидә уларниң қурулушиниңму башлинидиғанлиқини билдүрди.

җумһур рәис рәҗәп таййип әрдоған сөзидә, түркийәдики кәспий тәнһәрикәтчиләр саниниң 278 миңдин 6 милйон 225 миңға, тәнтәрбийә кулуби саниниң 6 миңдин 14 миңға чиққанлиқини қәйт қилди. у олимпик тәнһәрикәт йиғинлири үчүн тәнһәрикәтчиләрни йетиштүрүш вә ул – әслиһә қурулуши мәсилисидә, муһим мусапиләрни бесип өткәнликлирини билдүрди. у әрзурумдин анталйағичә, трабзондин мәрсингичә болған нурғун шәһәрләрдә хәлқаралиқ тәнтәрбийә мусабиқилири өткүзүш җәһәттә, муһим тәҗрибә – савақларниң йәкүнлинип, нурғун ул – әслиһә қурулушлириниң селинғанлиқини әскәртти.