тунҗи айал уруш айропилани учқучиси ләман бозқурт алтинчәкич һәққидә немиләрни билисиз
дидәм өзташбаши тәрипидин тәййарланған «биливелиң» намлиқ пирограммимизниң бүгүнки санида «тунҗи айал уруш айропилани учқучиси» һәққидики учурларни силәр билән ортақлишимиз.
түркийә авази радийоси: шималий атлантик окйан әһди тәшкилати — натониң тунҗи айал уруш айропилани учқучисиниң бир түрк икәнликини аңлиғанмидиңиз?
1933–йили дунйаға кәлгән ләман бозқурт алтинчәкич, түркийә вә шималий атлантик окйан әһди тәшкилатиниң тунҗи айал уруш айропилани учқучиси һесаблиниду.
кичикидин башлапла учқучи болушни арзу қилип кәлгән алтинчәкич, толуқ оттура мәктәпни пүттүргән йили арзусини әмәлгә ашуруш йолида дадил қәдәм ташлап, түркқушу инөнү мәркизидә пиланер мәшиқини башлайду. 1954 – йилидики айалларниңму түркийә армийәсигә елинса болидиғанлиқи тоғрисидики қарарниң сайисида измирдики һава армийәси академийәсигә илтимас суниду вә 1955 – йили өктәбирдә бу йәрдә оқуш – мәшиқ қилишни башлайду. пирқириғучлуқ айропиланлар билән башлиған учуш мәшиқлирини 1957 – йили тамамлап оқуш пүттүриду. у чағда дунйаниң әң чоң һәрбий иттипақи болған шималий атлантик окйан әһди тәшкилати аран бәш йашта иди.
ләман бозқурт алтинчәкич техиму йүксәкләрдә учуш арзуси билән уруш айропилани учқучиси тәрбийәси алиду. еришкән уруш айропилани салаһийәт гуваһнамиси билән уда тоққуз йил учушни давамлаштурған алтинчәкич, йалғуз түркийәниңла әмәс, натониңму тунҗи вә узун мәзгил бу вәзипини давамлаштурған бирдинбир айал уруш айропилани учқучиси сүпитидә тарих бәтлиридин орун алиду.
