җамәләргә вә дин хизмитигә аталған бир өмүр (авазлиқ)

әзиз мумин қериндашлар! җүмә күниңлар мубарәк болсун!

аләмләргә рәһмәт қилип әвәтилгән сөйүмлүк пәйғәмбиримиз мәдинигә һиҗрәт қилғандин кейин, тунҗи қилған иши бир мәсҗид йаситиш болған иди. пәйғәмбәр әләйһиссалам биз «мәсҗиди нәбәви» дәп билидиған бу мәсҗидни пүткүзүп болупла униң йәнә бир учиға игә чақисиз, кәмбәғәл саһабиләрниң туруши үчүн бир сайилиқ супа йасатқан иди. «сүффә» дәп нам берилгән бу сайилиқ супида йетип қопидиғанлар вақтлириниң асаслиқ көп қисмини пәйғәмбәр әләйһиссалам билән биргә өткүзүп, униңдин исламни өгинәтти. бир күни пәйғәмбәр әләйһиссалам мәсҗидкә киргинидә саһабиләрниң икки йумулақ җәмбәр шәклидә олтурғанлиқини көрди. бу җәмбәрләрниң бирсидә қуран оқулуп, дуа қилинатти. йәнә бирсидә болса, илим өгитидиған вә өгинидиғанлар топлашқан иди. пәйғәмбәр әләйһиссалам чоңқур сөйгү вә муһәббәт билән уларға бир һаза нәзәр салғандин кейин, «буларниң һәр бири хәйр үстидә икән. булар қуран оқуп дуа қилиду. аллаһ халиса, уларға телигини бериду, халиса бәрмәйду» деди. андин илим өгитидиған вә өгинидиғанлар һалқисиға қарап, «булар илим өгинип, илим өгитиватиду. мәнму муәллим қилип әвәтилгән идим» деди[1].

һөрмәтлик мусулманлар! әнә шу саадәт дәвридин һазирға қәдәр мәсҗид вә җамәлиримиз һәм аллаһқа ибадәт қилидиған, һәм илим – һекмәт өгинидиған улуғ җай болуп кәлди.

аллаһниң нәзиридики әң мәқбул йәр болған җамиләр؛[2] ичидә рәббимизниң намини зикри қилидиған, бәндичиликимизни, дуалиримизни вә теләклиримизни аллаһқа сунидиған муқәддәс җай болуп кәлди. җамәлиримиз тил, тән рәңги, ирқ, орун вә мәнсәп айрип олтурмастин, мөминләрниң қәлблирини бирләштуридиған, бирликимизни мустәһкәмләйдиған иманимиз вә мустәқиллиқимизниң символи болуп кәлди. җамә мунарлиримиз тәвһидниң сиволи, әзанлиримиз шаһәтлиримизниң асасий, меһрап, мунбәрлиримиз, һәқ вә һәқиқәтниң садаси, намаз үчүн тизилған сәплиримиз болса, хатириҗәмликниң капалити болуп кәлди.

әзиз мөмин қериндашлар! әҗдатлиримиз имам хәтиблик қилғанлардин тартип барлиқ җамә хадимлирини, йәни, меһрап вә мунбәрдин улуғ динимиз исламға хизмәт қилидиғанларни «хадимил хәйрат» йәни йахшилиқларниң хадимлири дәп атап кәлди.

бу «хадимил хәйрат» йәни йахшилиқларниң хадимлири пүтүн өмрини ислам дининиң хизмитигә беғишлап, «бу йахшилиқларниң бәдили пәқәтла аллаһниң ризаси» дегән қарша асасида сәмимийәт билән хизмәт қилип кәлди.  шәһәрләрниң мәнивий турмушиға йөнилиш бәлгиләйдиған муфтилар, оқуған әзанлири билән инсанийәтни ниҗатлиққа чақиридиған муәззинләр, меһрапта намаз қилидуридиған имамлар вә мунбәрдә исламниң топтоғра йолини өгитидиған хәтибләр пәрзәнтлиримизни улуғ китабимиз вә пәйғәмбәр әләйһиссаламниң үлгилик һайати билән изчил тунуштуруп кәлмәктә.

«силәрниң әң хәйрилик болғиниңлар, қуран өгәнкән вә өгәткәнлирңлардур[3]» дегән нәбивий илтипатқа мәзһәр болған қуран күрслиримиздики оқутқучилар вә шундақла аллаһниң «аллаһқа чақиридиған, салиһ әмәлләрни қилидиған вә шобһисизки, мусулманмән дәйдиғанлардин техиму гүзәл сөзлүк киши боламду?»[4] дегән илаһий хушхәвәригә наил болған моллилиримиз «хадимил хәйрат» йәни йахшилиқларниң хадимлири болуп кәлмәктә.

улар һайатимизниң һәр қайси бәтлиридә йенимизда турувлатқанлардур. чүнки улар туғулғинимизда әзан вә тәкбир билән илаһий хушхәвәрни қолқимизға сиңдургән, әң унтулмас өсмүрлүк чағлиримизда вә йол көрсәткүчигә һәммидин бәк еһтийаҗимиз болған йашлиқ дәвримиздә бизгә йол көрсәткүчи болғанлардур. улар вәтәнгә болған бурчимизни ада қилиш үчүн әскәргә маңғинимизда, йаки аилә қуруш үчүн тунҗи қәдәмни башқанлиримизда, һәтта мәңгүлүк сәпәргә атлинип, дунйа билән видалишидиған чеғимиздиму дуалири билән йенимда болғучилардур.

әзиз қериндашлар! һәр йили 1 - өктәбирдин 7 – өктәбиргичә болған бир һәптилик мәзгил түркийәдә җамә вә дин хадимлири һәптиси дәп тәбрилкинип кәлмәктә. бу йилму «җамәләргә вә динға беғишланған бир өмүр» дегән тема астида тәбриклинидиған бу һәптә бойичә, җамилиримизниң мәдәнийитимиздики орни вә әһмийити чүшәндүрилиду. динниң хизмитигә әмгәк сиңдүргән шәхисләр әсләп өтүлиду. әзиз миллитимизниң җамә вә қуран күрслирини бәрпа қилиш үчүн көрсәткән хизмәтлири, йардәм вә пидакарлиқлири хәйрилик дуалар билән әскә елиниду.

бу мунасивәт билән өтмүштин бүгүнгә қәдәр җамилиримизниң мадди вә мәнивий қурулуши үчүн тиришчанлиқларни көрситип кәлгән имам қериндашлиримиз арисидин вапат болуп кәткәнләргә аллаһтин рәһмәт, һайат болғанларға саламәтлик вә хатириҗәмликкә толған бир өмүр теләймиз.

аллаһ һәммимизни «хадимил хәйрат» йәни йахшилиқларниң хадимлири болушқа, инсанийәткә хәйрилик хизмәтләрни қилишқа нисип қилсун амин!