җедәлхор майа

түркийә авази радийоси: бар икәну, йоқ икән. бурунниң бурунсида әлгәк саман ичидә, төгә дәллал, бүргә сатираш икән. анам бөшүкүмни тәврәткән күнләрниң бир күни һава наһайити очуқ болған икән. шу күнләрдә бир дөләт бар болуп, у дөләттә наһайити чирайлиқ бир қиз бар икән. у һәр күни узун сериқ чачлирини тарап өрүйдикән. аниси елип бәргән бир-биридин чирайлиқ чач түгмилирини тақап, пакизә кийимлирини кийип, ойунчуқлирини ойнайдикән. гәрчә у ойунчуқлирини ойнисиму, хушал әмәс икән. һечқандақ нәрсә уни хушал қилалмайдикән. у достлири билән ойниғанда, улар билән хапилишип қалидикән. чүнки у өзиниң дегинини қилишқа урунидикән. өзиниң дегини бойичә болмиғанда хуйлинип, достлири билән җедәл қилидикән. балиларниң ойуни мушундақ давамлишиверипту. күнләрниң өтүши билән чөчикимизниң баш қәһримани йаман хуйлуқ майа һәммә достлиридин айрилип қапту. буниңдин униң ичи наһайити аччиқ бопту. йалғуз ойнаштин һечқандақ һузурлиналмапту. униң ойунчуқлири вә қорчақлири чирайлиқ болсиму, һечқайсси достлириниң орнини алалмайдикән. әслидә, майа достлириға қошулуп ойнашни бәкму халайдикән. у нурғун достлириниң көңлини рәнҗитип қойғанлиқтин, һечкимниң өзи билән биллә ойнимайдиғанлиқини билидикән. немә үчүн дегәндә, бир қанчә қетим у достлирини биллә ойнашқа чақирған икән. у йәнә:
- достлар, келиңлар, биллә ойнайли, - дәп, достлирини тәклип қилған болсиму, һечким униң билән ойнимапту. достлири:
- биз бир-биримизни хапа қилмай ойнаймиз, сән даим бизни рәнҗитисән, - дәпту. майа шуниңдин кейин, деризидин достлириниң хушал һалда уйақтин-буйаққа йүгрәп ойнаватқанлиқиға қарап олтуридиған бопту. у достлирини рәнҗиткәнликини билидикән. бир күни майаниң әқлигә бир әқил кәпту. у:
- қандақ қилип болмисун достлиримниң көңлини елишим лазим. бу начар миҗәзимни өзгәртишим керәк, - дәпту, өз-өзигә. у буни ойлап дәрһал сиртқа чиқип, достлириниң йениға берипту вә қилған – әткәнлиридин әпу сорапту. уларға достлуқниң қиммитини чүшинип йәткәнликини ейтипту. көңүлни рәнҗитишниң йаман иш икәнликини вә һечкимни рәнҗитмәстин муамилә қилишни өгәнгәнликини сөзләпту. достлири майани әпу қипту. шу күндин кейин, майа достлири билән йахши өтүпту вә һәргизму уларни рәнҗитмәпту. бу чөчикимизму бу йәрдә ахирлишипту.