кәпсиз кичик пати

түркийә авази радийоси: бар икәну, йоқ икән. бурунниң бурунсида әлгәк саман ичидә, төгә дәллал, бүргә сатираш икән. анам бөшүкүмни тәврәткән күнләрниң бир күни һава наһайити очуқ болған икән. чүнки у күни кичик патиниң туғулған күни икән. ундақ болса, һекайимизни кичик патидин башлайли:
кичик пати татлиқниң татлиқи, шеринниң шерини кичиккинә мүшүк аслини икән. кичик пати у күни сәһәр орнидин турупту. шип – шип қилип сүтини ичипту вә йумилақ қилип қойулған йипларни ойнашқа башлапту. йиплар һәммә йәргә йейилип кетипту. кичик патиниң аниси:
- мийав, мийав! һәммә йәрни қалаймиқан қилмиғин, йиплар бир – бири билән чегишип кәтти, - дәпту. кичик пати анисиниң гепини аңлиған болсиму:
- бундақ җимҗит олтурмайли, - дәп пичирлапту өз – өзигә. бу вақитта у, очуқ деризиниң йенидин учуп өткән қанатлири рәңлик бир кепинәкни көрүпту. пати уни көзитишкә башлапту вә:
һәй кепинәк, бу йәргә кәлгин, биллә ойун ойнайли, - дәпту. рәңлик кепинәк:
- сән билән бәкму ойниғим бар иди, әмма өйгә қайтишим керәк. анамға вәдә бәргән идим, болмиса мәндин әнсирәп қалиду,- дәпту вә алдирашқинә кетип қапту. кичик пати буни аңлап:
- бопту, мәйли. мән өзәм билән ойнай әмисә, - дәпту, өз – өзигә пичирлап. у йәнә йипларни ойнашқа башлапту, қизғуч йипниң үстигә сәкрәпту, йешил йипниң учини өзигә тартипту вә орундуқниң әтрапини йөгәпту. бу вақитта йәргә ташлап қойулған сүт шешисигә соқулупту. униң кичиккинә қоли сүт шешиси билән йипларниң арисида сиқишип қапту. у бәкму қорқуп кетипту. аниси бу вақитта уни қутқузғили йетип кәпту вә:
- пати һечқачан мениң гепимни аңлимайсән. қариғинә, бешиңға немә кәлди. алди билән сүт шешисиниң арисидин қолуңни чиқирайли, андин йуң йипларни чиқирайли, - дәпту.
- ойун ойнаватқанда туйуқсизла мушундақ болди, мән немә болғинини уқалмайла қалдим, - дәпту кичик пати.
- һәй пати, сән ойун ойнайсән, әмма кәпсизлик қилип өзәңгә вә әтрапиңға зийан салисән. саңа нәччә қетим гәп қилдим, әмма мениң гепимгә қулақ салмидиң. сән ойун ойниғанда чиққан гүлдүр – қарас қилған авазлардин һәммә адәм биарам болди. ойун ойнаш йахши иш, әмма башқиларниму ойлишимиз вә һечкимни биарам қилмаслиқимиз лазим. өзимизнила ойлисақ, буни «шәхсийәтчилик» дәймиз. шуңа, пати бундин кейин диққәт қилғин, - дәпту патиниң аниси. пати укүни анисиниң қанчилик тоғра ейтқанлиқини чүшинип йетипту вә уйқуға кетипту. шундин кейин, һечқандақ кәпсизлик қилмапту. чөчикимизму мушу йәрдә ахирлишипту.