қизил машина

түркийә авази радийоси: бар икәну, йоқ икән. бурунниң бурунсида әлгәк саман ичидә, төгә дәллал, бүргә сатираш икән. анам бөшүкүмни тәврәткән күнләрдә қатнаш қаидисигә бойсунмайдиған қизил рәңлик бир машина бар икән. машининиң рәңги шундақ гүзәл икәнки, пүтүн машинилар униңға һәйран икән. орундуқлири пар – пар парқирап туридикән. йеңи хелдики чақи болғанлиқи үчүн тағқиму чиқалайдикән, шәһәрдиму маңалайдикән. бу йеңи машининиң бирдинбир кәмчилики өзидин толиму махтинидикән. өзигә һәйранлиқ ичидә қариған машинилар билән һәргизму гәп қилишмайдикән. қизил машина башқа пүтүн машиниларниң рәңгини, тезликини, шәклини пәқәтла йақтурмайдикән. қатнаш вәқәсигә учриғанлирини мәсхирә қилидикән. улар тоғрисида, «диққәт қилмайду, уларниң мениңкидәк компийутери йоқ» дәйдикән. йамғур йағқан күнләрдә башқа машиниларниң йенидин тез өтидикән. бу вақитта, йәрдә йуғлишип қалған йамғур сулири вә лай – патқақлар башқа машиниларға чачрап мәйнәт қиливетидикән.
бир күни бу қизил машина йамғур сулири йуғлишип қалған йәрдин шундақ тез өтүптуки, аста кетиватқан машиниларниң алди деризилирини лай қиливетипту. алдини көрәлмигән бир машина қатнаш вәқәсигә учрапту. у соқулған машина йәнә бир машиниға соқулупту вә нәтиҗидә зәнҗирсиман қатнаш вәқәси оттуриға чиқипту. әтрап бирдинла қалаймиқан болуп кетипту. учқандәк маңған қизил машина бу авазларни аңлапту. әмма, кәйнигә қайтип достлириға йардәм қилмапту. қизил машина өз – өзигә:
- өзлириниң шори, диққәт қилған болса ундақ болмайтти. мән йолумға меңиверәй, - дәпту. бу вақитта йамғур сәвәбидин тешип кәткән дәрйаниң сулири қизил машинини еқитишқа башлапту. қизил машинниң електир йоли һөл болуп кәткәнликтин маңалмапту. қизил машина буни көрүп:
- мени қутқузуңлар, сәл мени дәрйаға еқитип кетиватиду, - дәп варқирапту. қизил машина су йүзи наһайити егиз болғачқа алди тәрәпни көрәлмәпту. достлириға йахши муамилә қилимиғанлиқиға интайин пушайман қипту. «лай суда тунҗуқуп өлидиған болдум» дәп ойлап турғинида йирақтин униңға товлаватқандәк бир авазни аңлапту. «немә болғанду?» дәп ойлап болғучә бирси арқидин тартқандәк һес қипту. у көзини ачқанда барлиқ машиниларниң алқиш йаңритиватқинини көрүпту. башқа машинилар қизил машининиң дәрйаға еқип кетиватқинини көрүп, һәммиси бирликтә уни қутқузувалған икән. сәлдә қалған қизил машина бу қетим хеҗил болуп кәткәнликтин қипқизил болуп кетипту вә:
һәммиңлардин әпу сораймән, мән силәргә йахши муамилә қилмидим, әмма силәр мени қутқузувалдиңлар. бундин кейин, мән силәрни һәргизму йалғуз ташлап қоймаймән, - дәпту. чөчикимизму бу йәрдә ахирлишипту.