гәп қилалайдиған гүлләр

түркийә авази радийоси: бар икәну, йоқ икән. бурунниң бурунсида әлгәк саман ичидә, төгә дәллал, бүргә сатираш икән. анам бөшүкүмни тәврәткән күнләрниң биридә, хуш хәвәр кәпту. мәрвә у күни сәһәрдә орнидин турупту. орнини йиғип, пакизә кийинипту вә анисини һәйран қалдурмақчи бопту.
- у қандақ қилсам болар, - дәп ойлаватқанда, бирдинла бағчидин гүл топлаш әқлигә кәпту.
- рәңгарәң чечәкләргә пүркәлгән наштилиқ дастихни тәййарлисам, анам наһайити хуш боп кетиду, - дәп ойлапту- дә, йүгүргиничә бағчиға чиқипту. бағчидики йапйешил чимәнләрниң үстидә көпкөк кичик – кичик чечәкләр, бағча темини қаплиған қизғуч гүлләр, хушпурақ йөгимәчләрниң астида йопурмақлири чоң дәстар гүлләр бар икән.
- анамға һәммә гүлләрдин топлишим лазим, у җәзмән хуш болиду, - дәпту. бу чағда униң қулиқиға наһайити йирақтин:
- өтүнүп қалайли, бизгә чеқилма, - дегән аваз аңлинипту. мәрвә интайин һәйран қапту. худдий бағчида гәп қилған бирси бардәкла билинипту. у чимниң үстидә астағинә меңипту. у диққәт қилип аңлиған икән, бу авазлар чечәкләрдин кәлгән икән. бу йопурмақлири инчикә вә нипиз дәстар гүлләрниң авази икән. дәстар гүлләр:
- сән наһайити омақ бала, немә үчүн бизни йулмақчи болисән, - дәп сорапту. мәрвә:
- мән анамни хуш қилмақчи, - дәпту. бу чағда, дәстар гүлниң йенидики тамға пүтүн күчи билән йамашқан хушпурақ йөгимәч гүлләрму гәпкә қетилипту.
- биз бу бағчида наһайити хушал. һәммимизниң йилтизи тупрақта. әтигәндә чиққан қуйашниң нури билән ойғинип, әтрапни шадлиққа чөмдүримиз. пуриқимиз барлиқ кишиләрни хушал қилиду. әмма, бизни йулсаң, бир күндила қуруп кетимиз. һазирқи гүзәлликимиз вә хушпурақлиримиздин әсәрму қалмайду. ойнаш үчүн бағчиға кәлгиниңдә бизни иккинчи көрәлмәйсән, - дәпту. мәрвә бу гәпләрни диққәт билән аңлап, һәммә гүлләрни бирму бир пурапту. у гүлләрниң дегинини ойлапту. бағчиниң қандақ гүзәл туридиғанлиқини, уларниң сөзлири билән чүшинипту. өйгә қайтқинида анисиниң дастихан салғинини көрүпту.
- ана, бағчидин гүл топлап, сени һәйран қалдурмақчи болғантим, бирақ гүлләрниң гүзәлликидин йулушқа қийалмидим, - дәпту. мәрвәниң аниси:
- саңа апирин, мәрвә. гүлләр бағчимизниң зининити. улар өзиниң таллирида наһайити чирайлиқ туриду. әқиллиқ қизимға апирин, - дәпту. чөчикимизму бу йәрдә ахирлишипту.