گرىنلەند مۇز قاتلىمىنىڭ ئېرىش سۈرئىتى خەتەرلىك سەۋىيەگە يەتكەن

تۈركىيە ئاۋازى رادىيوسى خەۋىرى: مېيىل ئونلاين (Mail Online) خەۋىرىدە بىلدۈرۈلىشىچە، ئامېرىكا بىلەن دانىيەنىڭ ئالىملىرى گرىنلەندنىڭ شەرقىي شىمالىدىكى مۇز قاتلىمىنىڭ ئېرىش سۈرئىتىنىڭ كىشىنى چۆچۈتىدىغان سەۋىيەگە يەتكەنلىكىنى بىلدۈرگەن.

ئالىملار مۇز قاتلىمىنىڭ ئېرىشىنى 2012-يىلدىن تارتىپ سۈنئىي ھەمراھ مەلۇماتلىرى ۋە رەقەملىك مودېللار ئارقىلىق تەتقىق قىلغان بولۇپ، ئېرىش سۈرئىتى مۇشۇ ھالەتتە داۋاملاشقان ئەھۋالدا 2100-يىلغىچە دېڭىز يۈزى سەۋىيەسى 1.27 سانتىمېتىر ئۆرلەيدىكەن.

مۇز قاتلىمىنىڭ 2011-يىلدىن بۇيان تەخمىنەن ئۈچ مېتىر نىپىزلىگەنلىكى ۋە بۇنىڭ گرىنلەند دېڭىز قىرغىقىدىن ئىچكى قىسىمغا قاراپ ئەڭ ئاز دېگەندە 200 كىلومېتىرغىچە كېڭەيگەنلىكى قەيت قىلىندى.

گرىنلەندنىڭ شەرقىي شىمالىدا ھۆل-يىغىننىڭ ئاز بولۇشى سەۋەبىدىن مۇز قاتلىمىدىكى ئېرىشنىڭ ئورنىنى تولۇقلىيالمىغانلىقى ئەسكەرتىلدى.

مەزكۇر تەتقىقات نەتىجىسى «تەبئەت ژۇرنىلى» دا ئېلان قىلىندى.