уйғур өсмүрләр қазан хәлқини һайаҗанға салди

түркийә авази радийоси хәвири: түркийәдә актип паалийәт елип бериватқан уйғур аммивий тәшкилатлиридин «шәрқий түркистан маарип вә һәмкарлиқ җәмийити» айаллар кометити мәсули мунәввәр өз уйғурниң башчилиқидики 30 кишилик өсмүрләр гүрүпписи 6 - айниң 13 - күни әнқәрәниң қазан наһийәси тәрипидин орунлаштурулған уйғур кечилики иптар зийапити пирограммисиға алаһидә тәклип билән қатнашти.

уйғур кечилики иптар зийапити пирограммисиға, наһийә рәһбәрлири, қазан хәлқи вә әнқәрә уйғурлири болуп көп санда киши қатнашти.  

пирограмма уйғур өсмүрләрниң қуран тилавити билән башланди. уйғур академик дотсент доктор әркин әмәт ечилиш нутиқида, уйғур райониниң нөвәттики вәзийитидин мәлумат бәрди.

арқидин уйғурчә әнәнивий кейимлирини кейишкән уйғур өсмүрләр уйғурчә нахша музика, шеир вә диний илаһиләрдин өрнәкләр көрситип, қазан наһийәсиниң һакими лоқман әртүрк әпәнди вә кәң амминиң қизғин алқишиға еришти.

ойун ахирлашқандин кейин уйғур балиларға вакалитән оқутқучиси мунәввәр өзтүрк ханим қазан наһийәсиниң һакими билән ханимиға аййултузлуқ көкбайрақ, доппа вә хатирә буйуми билән биргә көк рәңлик шарпа һәдийә қилди. шәһәр башлиқи вә айалиму  уйғур өсмүрләргә ойунчуқ совға қилди.

қазан наһийәсиниң һакими лоқман әртүрк әпәнди пирограмма җәрйанида мухбирларға бәргән байанатида уйғурлар һәққидә тохтилип, «биз уйғур түрклири қериндашлиримизниң  тартиватқан дәрд - әләмлирини йеқиндин көзитип келиватимиз. биз қазан хәлқиниңму уйғур хәлқигә чоңқур сөйгүмиз бар. уйғур хәлқи билән түрк хәлқиниң достлуқини күчәйтиш үчүн бу йил истанбулдин уйғур балиларни тәклип қилған идуқ. мана һазир қазан хәлқигә уйғур нахша - уссуллиридин өрнәкләр көрситиватиду» деди.

хитайниң уйғурларға йүргүзиватқан диний бесимлири үстидиму тохталған қазан наһийәсиниң һакими лоқман әртүрк әпәнди: «хитайниң диний бесим сийаситини қобул қилишимиз мумкин әмәс. инсанларниң диний етиқадиға һөрмәт қилиниши лазим. һәммә кишиләр әркин йашайалайдиған бир дунйа бәрпа қилишимиз керәк. мән хитай дөлитини уйғур қериндашлиримизниң һәқ – һоқуқиға толуқ риайә қилишқа чақириқ қилимән» деди.

истанбулда актип паалийәт елип бериватқан «шәрқий түркистан мәдәнийәт вә һәмкарлиқ җәмийити» айаллар комитети мәсули, уйғур тили мәктипиниң оқутқучиси мунәввәр өзуйғур ханим 30 нәпәр уйғур өсмүрләрдин тәшкилләнгән гуруппини елип әнқәрәгә кәлгән болуп, у, бу қетимқи паалийәтниң наһайити йахши өткәнликини байан қилди.

әнқәрәгә 45 километир узақлиққа җайлашқан қазан наһийәси 60 миң нопусқа игә болуп, түрк дунйаси тоғрисида давамлиқ паалийәтләр елип берилидиған наһийәләрдин бирси һесаблиниду.