русийә исраилийәни хәлқара инсанпәрвәрлик қанунидики мәҗбурийитини ада қилишқа чақирди

түркийә авази радийоси хәвири: русийә ташқи ишлар министирлиқи байанатчиси марийа захарова пайтәхт москвада өткүзүлгән һәптилик мухбирларни күтүвелиш йиғинида күнтәртиптики мәсилиләр тоғрисида тохталди.

захарова исраилийәниң ғәззәгә қаратқан һуҗумлири тоғрисида тохтилип: «исраилийә һөкүмитини ғәззәдики қан төкүлүшни тохтитишқа, бирләшкән дөләтләр тәшкилати хәвпсизлик кеңиши вә б д т омумий кеңишиниң 1967-йилидики чеграларни асас, шәрқий қуддусни пайтәхт қилидиған мустәқил пәләстин қуруш тоғрисидики қарарлириға асасән, пәләстин-исраилийә мәсилисини тинч усулда һәл қилиш сөһбәтлирини әслигә кәлтүрүшкә вә хәлқара инсанпәрвәрлик қанунидики мәҗбурийәтлирини ада қилишқа чақиримиз» деди.

захарова иреландийә, испанийә вә норвегийәниң пәләстинниң мустәқиллиқини етирап қилиш қарариға баһа берип: «бу хәлқара җәмийәтниң ғәззәдә йүз бәргән паҗиәлик вәқәләр, миңларчә пуқраниң өлүми вә мисли көрүлмигән дәриҗидики инсанпәрвәрлик киризисиға инкас қайтуралмай туралмайдиғанлиқини көрситип бериду» деди.

«америка қошма иштатлириниң оттура шәрқ мәсилисигә тутқан позитсийәсиниң райондики дөләтләргә зийан йәткүзидиғанлиқи» ни оттуриға қойған захарова: «хәлқара җәмийәт оттура шәрқтә тинчлиқ орнитишниң тәхирсизликигә барғансери ишиниватиду. бу чоқум икки дөләтлик һәл қилиш формуласини йолға қойуш арқилиқ әмәлгә ашурулуши керәк» дегәнләрни сөзлиригә илавә қилди.