әнглийә ийулда сайлам өткүзиду

түркийә авази радийоси хәвири: баш вәзир риши сунак һәптилик кабент йиғинини ахирлаштуруп, 10-номурлуқ ишхана алдида байанат елан қилди.

у йеқинқи бәш йилда әнглийәниң иккинчи дунйа уруши (1945-1939) дин буйанқи әң қийин мәзгилни баштин кәчүргәнликини билдүрүп, буниңға қарши күрәш қилғанлиқлирини ейтти.

у иқтисадий муқимлиқниң һәр түрлүк мувәппәқийәтниң асаси икәнликини, әнглийә иқтисадиниң давамлиқ ешиватқанлиқини вә пул пахаллиқиниң нормал һалға кәлгәнликини әскәртти.

у йәнә, өсүм нисбитиниң төвәнлигәнликини, һөкүмәт пиланиниң үнүмлүк болғанлиқини, шундақтиму нурғун кишиләр үчүн ишларниң асан әмәсликини вә буни билидиғанлиқлирини қәйт қилди.

у әмди хәлқтин «кимгә ишинисиз?» дәп сораш керәкликини тәкитләп, сөзини мундақ давамлаштурди:

«һазир әнглийәниң кәлгүсини таллайдиған вақит йетип кәлди. биз қолға кәлтүргән илгириләшләрниң үстигә йеңи нәтиҗиләрни қойушни йаки пилансиз вә ениқлиқтин мәһрум һалда бешиға қайтип келишни халайдиғанлиқимизни қарар қилишниң вақти йетип кәлди.   мән падишаһ  чарлиз билән көрүшүп, парламентни тарқитиветишни тәләп қилдим. падишаһ бу тәләпни қобул қилди. биз 4-ийул чоң сайлам өткүзимиз. »

у сайлиғучиларниң дөләткә ениқ пилани вә дадил һәрикәт қилидиған бир партийәни таллиши керәкликини әскәртип, «чоң өктичи ишчилар партийәси» ниң әнглийә үчүн кәлгүси пиланиниң йоқлуқини илгири сүрди.

у ахирида, өзиниң сайлам риқабити җәрйанида һәр бир беләт үчүн тиришидиғанлиқини, сайлиғучиларниң ишәнчисигә еришидиғанлиқини, пәқәт униң рәһбәрликидики консерватиплар партийәси һөкүмитиниңла иқтисадий муқимлиққа капаләтлик қилалайдиғанлиқини қәйт қилди.