«йавропа иттипақи пәләстин мәсилисидә бөлүнүп кәтти»
йавропа иттипақи ташқи мунасивәтләр вә хәвпсизлик сийасәтлири алий вәкили җосеп боррел украина-русийә урушида бирдәк һәрикәт қилған йавропа иттипақи дөләтлириниң пәләстин мәсилисигә кәлгәндә бөлүнүп кәткәнликини ейтти.
түркийә авази радийоси хәвири: җосеп боррел америка қошма иштатлириниң станфорд университетиниң хувер институтида қилған сөзидә, ғәззә райониниң нөвәттики вәзийити һәққидә тохталди.
боррел пәләстин һөкүмитини күчәйтиш үчүн сийасий басқучниң башлиниши керәкликини тәкитләп мундақ деди:
«бу инсаний тирагедийәдин қутулушниң бирдинбир йоли киризисни икки дөләтлик түзүм асасида һәл қилиш чарисидур. буни биз техиму йуқири авазда ениқ оттуриға қойушимиз керәк. һәрқанчә қийин болсиму, инсанийәтниң виҗданиға дағ чүшүридиған бу инсаний тирагедийә (исраилийәниң районда давамлаштуруватқан һуҗумлири) ға хатимә бериштин башқа чиқиш йоли йоқтур.»
боррел йавропаниң пәләстин мәсилисидә бөлүнүп кәткәнликини әскәртип мундақ деди:
«йавропа иттипақи әллири бәзи әһвалларни һесабқа алмиғанда, русийәгә қарши бирдәк һәрикәт қилди, җүмлидин украинани сийасий, иқтисадий җәһәттин, һәр җәһәттин бирдәк қоллиди. ғәззә мәсилисигә кәлгәндә ундақ қилалмиди.»
у йавропа иттипақиниң киризисни икки дөләтлик түзүм асасида һәл қилиш үчүн мәсулийәтни өз үстигә алғанлиқини вә әрәб иттипақдашлар билән болған алақиниң давам қиливатқанлиқини байан қилип мундақ деди:
«америка тәрәп киризисни икки дөләтлик түзүм асасида һәл қилиш пиринсипида чиң турушта сәл чарчап қалғандәк қилиду.»
игилинишичә, исраилийәниң 7-өктәбирдин башлап ғәззә районида давамлаштуруватқан һуҗумлирида көпинчиси балилар вә айалларни өз ичигә алған 35 миңдин артуқ пәләстинлик һайатидин айрилған.
