иран исираилийәниң һуҗумиға техиму күчлүк җаваб қайтурулидиғанлиқини билдүрди
иран ташқи ишлар министири һүсәйин әмир абдуллаһийан исираилийәниң һуҗум қилиш еһтималлиқи үстидә тохталғанда, «тез сүрәттә», «техиму күчлүк» вә «техиму кәң көләмдә» җаваб қайтурулидиғанлиқини ейтти.
түркийә авази радийоси хәвири: иран тәсним агентлиқи ташқи ишлар министири һүсәйин әмир абдуллаһийан әнглийә ташқи ишлар вәзири давид камерон билән телефонда көрүшкәнликини хәвәр қилди.
хәвәрдә билдүрүлишичә, һүсәйин әмир абдуллаһийан әнглийә ташқи ишлар вәзири давид камеронға, иранниң һәптә ахири исираилийәгә қилған һава һуҗуминиң «қанунлуқ өзини қоғдаш һоқуқи» рамкисида елип берилғанлиқини, райондики киризисларниң тегидә, исираилийәниң иғвагәрчилик характерлик сийаситиниң барлиқини ейтқан.
у исираилийәниң ғәззәдә онмиңларчә пуқрани өлтүргән һуҗумлирини әнглийәниң қоллиғанлиқини тәнқидләп: «йеқинқи алтә айда бигунаһ ғәззә хәлқиниң бешиға йүз миңларчә тонна бомба йағдурулуватқан бир вақитта, әнглийә һөкүмитиниң иранниң б д т әһдинамәсиниң 51-маддисиға асасән қанунлуқ өзини қоғдаш һоқуқи рамкиси ичидә, исираилийәниң дипломатик орунға қилған вәһшийләрчә һуҗумиға қайтурған инкасидин әндишә қилиши кишини һәйран қалдуриду» деди.
у тел авивниң иран земиниға һуҗум қилиш еһтимали үстидә тохталғанда болса: «иран район вәзийитиниң техиму җиддийлишишини халимайду, әмма исираилийә җедәл чиқарса <тез сүрәттә>, <техиму күчлүк> вә <техиму кәң көләмдә> җаваб беримиз» деди.
исираилийә 1-апрел (2024) иранниң сүрийә пайтәхти дәмәшиқтики әлчихана бинасини бомбардиман қилип, йәттә иранлиқни өлтүргән иди. буларниң ичидә иран инқилабий муһапизәтчиләр қисминиң икки генерали бар иди.
иран буниң дөләт земиниға һуҗум қилғанлиқ болидиғанлиқини вә өч алидиғанлиқини елан қилған иди. исираилийә болса, иранниң һуҗумлириға җаваб қайтуридиғанлиқини билдүргән иди.
иран 13-апрел кечидә исираилийәгә қаритип йүзләрчә учқу вә онларчә башқурулидиған бомба қойуп бәрди. нәтиҗидә, исираилийәниң бәзи һәрбий базилириға башқурулидиған бомба чүшкәнлики қәйт қилинди.
исираилийә учқу вә башқурулидиған бомбиларниң көпинчисиниң һава қалқан системиси тәрипидин тосувелинғанлиқини, җәнубтики һәрбий базиға бир башқурулидиған бомба чүшкәнликини уқтурди.
исираилийә исираилийә армийәси баш иштаб башлиқи херзи халеви кан (KAN) телевизийәсиниң зийаритини қобул қилғанда, иранниң һава һуҗумиға җаваб қайтурулидиғанлиқини билдүргән иди.
