ئامېرىكا: جىددىيچىلىك ئىراننىڭ مەنپەئەتىگىمۇ ئۇيغۇن ئەمەس

تۈركىيە ئاۋازى رادىيوسى خەۋىرى: ئامېرىكا تاشقى ئىشلار مىنىستىرلىقى باياناتچىسى ماتېۋ مىللېر كۈندىلىك مۇخبىرلارنى كۈتۈۋېلىش يىغىنىدا، ۋاشىنگتوننىڭ ئوتتۇرا شەرقتىكى جىددىيلىكنىڭ كۈچىيىپ كېتىش خەۋپىدىن قايغۇرۇۋاتقانلىقىنى، ئىراننىڭ ئىسرائىلىيەگە قاراتقان تەھدىتىنىڭ كىشىنى ئەندىشىگە سالىدىغانلىقىنى بىلدۈردى ۋە ئامېرىكانىڭ بۇ تەھدىتلەرگە قارىتا ئىسرائىلىيەنى تولۇق قوللايدىغانلىقىنى ئەسكەرتتى.

ئامېرىكا تاشقى ئىشلار مىنىستىرى ئانتونىي بلىنكېننىڭ بۇ مەسىلىنى چۆرىدەپ دىپلوماتىك خىزمەتلەرنى ئىشلەۋاتقانلىقىنى، بۇ دائىرىدە تۈركىيە، خىتاي ۋە سەئۇدى ئەرەبىستانلىق كەسىپداشلىرى، شۇنداقلا ياۋروپادىكى ئىتتىپاقداشلىرى بىلەن ئالاقىلەشكەنلىكىنى بىلدۈرگەن مىللېر، مىنىستىر بلىنكېننىڭ ئىرانغا ئېنىق ئۇچۇر بېرىلىشىنى خالايدىغانلىقىنى بايان قىلىپ: «جىددىيلىكنىڭ كۈچىيىشى ئىران، رايون ياكى دۇنيانىڭ مەنپەئەتىگە ئۇيغۇن ئەمەس» دېدى.

ئىسرائىلىيە 1-ئاپرېل ئىراننىڭ دەمەشىقتىكى ئەلچىخانىسىنىڭ كونسۇلخانا بىناسىغا ھاۋادىن ھۇجۇم قىلىپ، ئىران ئىنقىلاب  مۇھاپىزەتچىلىرى قىسىملىرىنىڭ ئىككى گېنېرالىنى ئۆز ئىچىگە ئالغان يەتتە ئەسكىرىنى ئۆلتۈرگەن. ھۇجۇمدا يەنە سۈرىيە پۇقراسى ئالتە كىشى ھاياتىدىن ئايرىلغانىدى.