әрдоған: «әмдики мәқситимиз тәрәққий тапқан дөләтләрниң алдинқи қатаридин орун елиш»
җумһур рәис әрдоған анталйа дохтурхана шәһри вә улиниш йоллириниң ечиш мурасимида нутуқ сөзлиди.
түркийә авази радийоси хәвири: җумһур рәис рәҗәп таййип әрдоған <түркийә әсри> тәсәввури билән техиму чоң нишанларға қарап меңиватқанлиқини тәкитләп: «әмдики мәқситимиз тәрәққий тапқан дөләтләргә йетишивелиш әмәс, бәлки уларниң алдин қатаридики орнимизға еришиштур» деди.
әрдоған дохтурхана шәһәрлирини түркийәниң сәһийә саһәсидә ишқа ашурған бөсүш характерлиқ символи дәп қарайдиғанлиқини билдүрди.
әрдоған: «дөлитимизни 4 асасий түврүк үстидә йүксәлтишкә вәдә бәргән, биз буларни маарип, сәһийә, адаләт вә бихәтәрлик дәп рәткә тизған идуқ. бу саһәләрдә биз елип барған ислаһатлар нәтиҗисидә тинч вә бихәтәр дөләттә йашимақтимиз» деди.
дохтурхана шәһәрләрниң түркийәгила хас йеңи сәһийә мулазимәт системиси икәнликини әскәрткән әрдоған, пуқраларниң илгири диагноз қойуш вә давалаш үчүн чәт әлләргә беришқа мәҗбур болғанлиқини, әмдиликтә болса түркийәниң барлиқ тармақларда дегүдәк дунйа бойичә алдинқи қатардики сәһийә мулазимити мәркәзлириниң биригә айланғанлиқини билдүрди.
әрдоған: «түркийә әсри тәсәввури билән биз техиму чоң нишанға йүзләндуқ. әмдики мәқситимиз тәрәққий тапқан дөләтләргә йетишивелиш әмәс, бәлки уларниң алдинқи қатаридики орнимизға еришиштур. биз йашлиримизға сийасәт, иқтисад вә мудапиә билән һәр саһәдә пәхирлинәләйдиған бир дөләтни қалдурушни халаймиз. буниң үчүн кечә-күндүз ишлимәктимиз» деди.
