йавропа тиктокни тәкшүрүшни башлиди

түркийә авази радийоси хәвири: йавропа иттипақи комитети байанат елан қилип, «балиларни қоғдаш, ашкара елан бериш, тәтқиқатчиларниң мәлуматқа игә болуши, супиниң хумар қилиш лайиһәси билән зийанлиқ мәзмунларниң хәтәрлири» гә мунасивәтлик мәсилиләрдә рәқәмлик хизмәтләр қануниға хилаплиқ қилған-қилмиғанлиқиниң тәкшүрүлидиғанлиқини билдүрди.

тиктокни рәсмий тәкшүрүш, тиктокниң сентәбир (2023) дә комитетқа сунған доклат вә мәлумат тәләп қилип соралған соалларға берилгән җаваблардин кейин елип берилған дәсләпки тәкшүрүш ахирлашқанда башланди.

байанатта, тиктокниң қорамиға йәтмигәнләрниң намувапиқ мәзмунларға еришишиниң алдини елиш үчүн қолланған йаш тәкшүрүш системисини өз ичигә алған башқа тәдбирлириниң «йетәрлик, мувапиқ вә үнүмлүк» икәнликидә гуман барлиқи көрситилди.

тиктокниң қорамиға йәтмигәнләр үчүн йуқири сәвийәдә мәхпийәтликни вә бихәтәрликни капаләткә игә қилиш үчүн мувапиқ һәмдә йетәрлик тәдбирләрни йолға қойған-қоймиғанлиқи тәкшүрүлиду.

тиктокниң хумар қилиш лайиһәси пәйда қилидиған сәлбий тәсирлириниң балилар һәқ-һоқуқиниң қоғдилишиға, шәхсниң җисманий вә роһий сағламлиқиға, радикаллишишқа көрситидиған сәлбий тәсирлириму тәкшүрүлиду.

йуқириқилардин башқа, тиктоктики еланларниң рәқәмлик хизмәтләр қануниға уйғун йаки әмәслики, тәтқиқатчиларниң аммиға ечиветилгән мәлуматларға еришәлишидә «гуманлиқ йетәрсиликләр», тәкшүрүш темилириниң ичидин орун алиду.

йавропа иттипақиниң авғуст (2023) ейида иҗра қилинишқа башланған қануни, рәқәмлик супиларға қаттиқ бәлгилимиләрни кәлтүргән иди.

йавропа иттипақи қанун бәлгилимилиригә хилаплиқ қилған рәқәмлик супиларға дунйа миқйасидики мәблиғиниң %6 гә тәң келидиған сәвийәгичә җәриманә қойса болиду. хилаплиқ қилмишлар тәкрар йүз бәргән әһвалда супиларни йавропа иттипақида паалийәт қилишини чәкләйду.