б д т: украинада тинчлиқ үчүн мәсилини йилтизидин һәл қилиш керәк
б д т украинада урушниң тохтитилиши вә тинчлиқниң орнитилиши үчүн бир келишимниң йетәрлик болмайдиғанлиқини, мәсилини йилтизидин һәл қилиш керәкликини билдүрди.
түркийә авази радийоси хәвири: б д т ниң йавропа, оттура асийа вә америка ишлириға мәсул муавин баш катипи мирослав җенка хәвпсизлик кеңишидә русийәниң тәлипигә бинаән ечилған украина йиғинида, әза дөләтләргә мәлумат бәрди.
у русийәниң украинани «ишғал қилиш уруши» башлиғанлиқиға икки йил болғанлиқини хатирилитип, әслидә украинада урушниң башлинишини 2014-йилиғичә узартишқа болидиғанлиқини унтумаслиқ керәкликини әскәртти.
у украинадики урушниң барғансери шиддәтлиниватқанлиқидин вә пуқраларға қаттиқ тәсир көрситиватқанлиқидин әндишә қиливатқанлиқлирини билдүрүп, мәсилини адил вә узун муддәтлик һәл қилиш чарисиниң тәдриҗий бузулуватқанлиқини қәйт қилди.
у: «тинчлиқ келишиминиң өз алдиға зораванлиқларни ахирлаштуруш үчүн йетәрлик болмайдиғанлиқини билимиз. тинчлиқ орнитиш тиришчанлиқлири мәсилини йилтизидин һәл қилишқа күчиши керәк. җәмийәттики барлиқ қатламларниң мәсилини һәл қилишқа адил шәкилдә қатнишиши муһим әһмийәткә игә» деди.
у украина үчүн асаслиқ еһтийаҗниң б д т шәртнамиси, хәвпсизлик кеңишиниң қарарлири вә хәлқара қанунға мувапиқ узун муддәтлик шундақла һәммигә қучақ ачидиған тинчлиқ икәнликини әскәртип, җиддий вәзийәтни пәсәйтиш вә дипломатик тиришчанлиқларни күчәйтишкә чақирди.
