yawropa ukrainagha 50 milyard yawro yardem qilishni qarar qildi

türkiye awazi radiyosi xewiri: ukraina pirézidénti wolodimir zélénskiy tünügün (1-féwral) biryussélda ötküzülgen yawropa ittipaqi rehberler yighinigha tor arqiliq qatniship, ukrainagha 50 milyard yawroluq yardem qarari üchün her qaysi döletlerning rehberlirige teshekkür éytti.

u: «bu ukraina we yawropaning qeddini tik tutup turidighanliqining roshen ipadisi. bu qararning 27 eza dölet teripidin awaz birliki bilen qobul qilinishimu intayin muhim. bu ukraina bilen bille ikenlikinglarning we qollishinglarning bashqiche roshen namayendisi hésablinidu» dédi.

u yawropaning toluq bixeterlikini we qararlirining ünümini körsitish kéreklikini tekitlep, mundaq dédi:

«rusiyening yawropagha qarshi ukraina aldinqi sépidiki hujumlirigha bir rus ittipaqdishi, yeni shimaliy koréyedin keltürülgen zembirek oqliri bilen bashqurulidighan bombiliri qoshuldi. bular ul-eslihelirimizge buzghunchiliq salghan iranning <shahéd> uchqulirigha qoshulup, sheherlirimizge ziyan salmaqta. qolgha chüshürgen axbaratlirimiz rusiyening piyongyangdin 1 milyon pay zembirek oqi sétiwalidighanliqini toghrilimaqta.»

u yawropaning ukrainani 1 milyon pay zembirek oqi bilen teminlesh pilani üstide toxtilip, bu pilanning köp kéchikkenlikini eskertti.

u yawropa tinchliq fondi terkibide kelgüsi töt yil üchün 5 milyard yawro meblegh ajritilidighan «ukraina yardem fondi» ni tesis qilishta, yawropa ittipaqi rehberlirining awaz birlikige éhtiyajliq ikenliklirini qeyt qildi.

u yanwar (2024) éyida shiwiyétsariyeni ziyaret qilghanda, dunya tinchliq rehberler yighini échish toghrisida pikir birdeklikige kelgenliklirini xatirilitip, yawropa rehberlirini yighin teyyarliqlirigha aktip qatnishishqa chaqirdi.