америка үч әскири җенидин айрлған һуҗумға җаваб қайтуридиғанлиқини елан қилди
америка сүрийә-ийорданйә чеграсидики һәрбий базида үч әскәр җенидин айрилған һуҗум сәвәбидин иран билән уруш қилишни ойлашмиғанлиқини билдүрди.
түркийә авази радийоси хәвири: ақсарай дөләт хәвпсизлик кеңиши истратегийәлик учур-алақә кординатори җон кирби күндилик ахбарат елан қилиш йиғинида, америка һәрбий базиси һуҗумға учриғандин кейинки өзгиришләр тоғрисида мәлумат бәрди.
у пирезидент байдинниң бу һуҗумға «мувапиқ җаваб қайтуруш» ирадисиниң қәтий икәнликини билдүрүп, «иран билән уруш қилмаймиз, иран һакимийити билән һәрбий җәһәттә тоқунушмаймиз» деди.
у районда җиддийчиликни улғайтиш нийәтлириниң йоқлуқини әскәртип, һәптә ахири йүз бәргән һуҗумниң җиддийчиликни күчәйтидиған һуҗум икәнликини, буниңға җаваб қайтуруш керәкликини қәйт қилди.
у һуҗумға қандақ җаваб қайтуридиғанлиқлири, орни вә вақти тоғрисидики барлиқ тәпсилатларниң өзлиридә тәййар икәнликини, әмәлгә ашурулғанда көпчиликниң көридиғанлиқини билдүрди.
ташқи ишлар министири антони блинкенму нато баш катипи столтенберг билән вашингтонда өткүзгән ахбарат елан қилиш йиғинида мәзкур һуҗум үстидә тохтилип: «биз у һуҗумға җаваб қайтуримиз, җавабимиз көп қатламлиқ, басқучлуқ вә узун муддәтлик болиду» деди.
пирезидент җо байдин 28-йанвар (2024): «ийорданийәниң шәрқий шималида, сүрийә чеграси әтрапиға орунлашқан әскәрлиримизгә учқу билән қилинған һуҗумда, үч әскиримиз җенидин айрилди, нурғун әскәрлиримиз йариланди» дегән иди.
