америка омумийүзлүк уруш тохтитишни қоллимиғанлиқини етирап қилди
америка һөкүмити ғәззәдә омумийүзлүк уруш тохтитиш әмәс, бәлки әсирләрниң қойуп берилиши вә районға инсанпәрвәрлик йардәмлириниң йәткүзүлүши үчүн «инсанпәрвәрликни чиқиш қилған вақитлиқ уруш тохтитиш» ни қоллиғанлиқини билдүрди.
түркийә авази радийоси хәвири: ақсарай дөләт хәвпсизлик кеңиши истратегийәлик учур-алақә кординатори җон кирби күндилик ахбарат елан қилиш йиғинида, ғәззәниң нөвәттики вәзийити вә исираилийәниң һуҗумлири үстидә тохталди.
у мухбирларниң исираилийәниң ғәззәдә барғансери күчийиватқан һуҗумлириға мунасивәтлик соалға җаваб бәргәндә, «бу мәсилә исираилийә һөкүмитиниң һәрбий пилани» дәп өткүзүветишкә тиришти вә америка һөкүмитиниң исираилийәниң һамасни йоқитишини қоллиғанлиқини, әмма пәләстин пуқралириниң қоғдилиши керәкликини тәкитлиди.
у: «әсирләрни қутқузуш үчүн инсанпәрвәрликни чиқиш қилған вақитлиқ уруш тохтитишни қоллаймиз. буниңға мунасивәтлик сийаситимиз өзгәрмиди. исираилийә һамасқа қарши уруш қиливатиду. исираилийәниң өзини қоғдаш һоқуқи бар» деди.
һамасниң һәрбий қанити болған қәссам биригадилири 7-өктәбир (2023) «әқса топани» намлиқ кәң көләмлик һуҗум қозғиғанлиқини җакарлиған. исраилийә армийәсиму уруш айропиланлирини ишлитип ғәззәни бомбардиман қилишни башлиғаниди.
икки тәрәпниң күнсери кәскинләшкән тоқунушлирида көпинчиси кичик балилар вә айаллар болуп 25 миңдин артуқ пәләстинлик җенидин айрилди.
