pakistan iranning qilghan hujumlirini eyiblidi

türkiye awazi radiyosi xewiri: pakistan tashqi ishlar ministirliqining bayanatida, pakistanning igilik hoquqigha dexli-teruz qilishning qetiy qobul qilinmaydighanliqi we éghir aqiwetlerni keltürüp chiqiridighanliqi tekitlendi.

bayanatta, iranning pakistanning hawa boshluqigha sewebsiz dexli-teruz qilghanliqi küchlük eyiblendi we hujumda ikki kichik bala qaza qilip, üch balinng yarilanghanliqi, yarilanghanlarning kichik qizlar ikenliki uqturuldi.

bayanatta, pakistan bilen iran otturisida her xil alaqe qanallirining mewjut ikenlikige qarimastin, bu xil qanunsiz heriketlerning yüz bérishining kishini téximu bek endishige salidighanliqi tekitlendi.

bayanatta: «pakistanning küchlük naraziliqi iran tashqi ishlar ministirliqining téhrandiki alaqidar yuqiri derijilik emeldarlirigha yetküzüldi» déyildi.

iranning munasiwetlik diplomatlirining pakistan tashqi ishlar ministirliqigha chaqirilghanliqi bildürülgen bayanatta yene, bu ehwalning aqiwitige bolghan jawabkarliqning biwasite irangha tewe ikenliki uqturuldi.

pakistanning her daim térrorluqning rayondiki barliq döletlerge nisbeten ortaq tehdit ikenlikini tekitlewatqanliqi we mas qedemde heriket qilishning zörürlükini eskertip kéliwatqanliqi bildürüldi.

bayanatta: «bu xil bir tereplime heriket yaxshi qoshnidarchiliq munasiwetlirige mas kelmeydu, özara ishenchni éghir derijide ziyangha uchritidu» déyildi.