исраилийәниң уруш кабинетида бенйамин нетанйаһу киризиси йүз бәрди
баш министир бенйамин нетанйаһу өткүзгән ахбарат елан қилиш йиғиниға исраилийә дөләт мудапиә министири йов галант билән уруш кабинети әзаси бенний гантиз қатнишишни рәт қилди.
түркийә авази радийоси хәвири: исраилийәдә 7- өктәбирдин кейин нетанйаһуниң рәһбәрликидә қурулған вә гантиз билән галантму әзаси болған уруш кабинетида урушқа қоманданлиқ қилиш вә әсир алмаштуруш мәсилилиридә еғир ихтилаплар көрүлүп кәлмәктә.
исраилийә дөләт таратқулириниң хәвиригә асасланғанда, бу талаш-тартишларға йеңи бирси қошулған.
исраилийә дөләтлик телевизийә қанили «KAN» ниң X иҗтимаий алақә суписидики байанатида, галант билән гантизниң нетанйаһуниң тел авивда өткүзгән ахбарат елан қилиш йиғиниға қатнишишни рәт қилғанлиқи билдүрүлди.
байанатта галант билән гантизниң немә үчүн бу қарарға кәлгәнликлири һәққидә учур берилмиди.
пәләстин исламий қаршилиқ көрситиш һәрикити — һамасниң һәрбий қанити болған қәссам биригадаси 7-өктәбирдә исраилийәниң пәләстинликләрниң һоқуқини вә мәсҗиди әқсани өз ичигә алған муқәддәс қиммәтлирини изчил һалда айағ асти қиливатқанлиқиға наразилиқ билдүрүш үчүн, «әқса топани» намлиқ кәң көләмлик һуҗум қозғиғанлиқини җакарлиған. исраилийә армийәсиму уруш айропиланлирини ишлитип ғәззәни бомбардиман қилишни башлиған иди.
исраилийәниң ғәззә райониға қилған һуҗумида 22 миңға йеқин пәләстинлик пуқра өлтүрүлди вә 56 миңдин артуқ пәләстинлик йаридар қилинди.
исраилийә қисимлири 7-өктәбирдин буйан 504 әскириниң өлтүрүлгәнликини елан қилди.
тоқунушларни «инсанпәрвәрлик нуқтисидин вақитлиқ тохтитиш» җәрйанида 81 исраилийәлик әсир вә 240 пәләстинлик мәһбус өз-ара қойуп берилгән иди.
