heniyye: hamas we bashqa qarshiliq körsetküchilerchette qaldurulghan sénariyeler xam xiyaldin ibaret

türkiye awazi radiyosi xewiri: heniyye hamasning télégram supisidiki adrésida bayanat élan qilip, pelestin xelqi we qarshiliq körsitish küchlirining qudretlik, iradilik we sewrchan ikenlikini, özlirining israiliye ishghaliyitining axirlishidighanliqigha toluq ishinidighanliqlirini bildürdi.

hamas hökümitining xelqara organlar bilen bolghan alaqisining dawamlishiwatqanliqini bildürgen heniyye, özlirining pelestin xelqining azab-oqubetlirini yenggillitish we yardemlerning ulargha yétip kélishige kapaletlik qilish üchün tirishiwatqanliqlirini tekitlidi.

«ghezzening kelgüsige munasiwetlik hamas we (pelestindiki bashqa) qarshiliq körsitish guruppilirini öz ichige almighan her qandaq sénariye xam xiyaldin ibaret» dégen heniyye, ereb we bashqa islam döletlirini pelestin xelqining kürishini qollashqa chaqirdi.

pelestin islamiy qarshiliq körsitish herikiti — hamasning herbiy qaniti bolghan qessam birigadasi 7-öktebir israiliyening «pelestinliklerning hoquqi we mesjidi eqsani öz ichige alghan muqeddes qimmetlerni izchil halda ayagh asti qiliwatqanliqigha naraziliq bildürüsh üchün, «eqsa topani» namliq keng kölemlik hujum qozghighanliqini jakarlidi.

israiliye 7-öktebirdiki hujumlarda 1200 israiliyelikning ölgenlikini, 5132 kishining yarilanghanliqini élan qildi.

israiliyening ghezzege qaratqan hujumlirida, kem dégende 8000 i balilar, 6200 ayallar bolup, jemiy 18608 pelestinlik qaza qildi. minglarche pelestinlik hazirghiche xarabilikler astida yatmaqta. xelq panahliniwatqan doxturxana, mektep dégendek orunlar üzlüksiz bombardiman qilinmaqta.

qoralliq muhasire astida tutup turuluwatqan 1 milyon 900 ming ghezzelik, turalghu, yémeklik, pakiz su, dora we saghlamliq mulazimitidin mehrum halda hayatliq kürishini dawamlashturmaqta.