йавропа иттипақи: исраилийә ғәззәдә ирқий қирғинчилиқ йүргүзүватиду
йавропа иттипақи ташқи мунасивәтләр вә бихәтәрлик сийасити алий вәкили җосеп боррел исраилийәниң ғәззәдә давамлаштуруватқан һуҗумлирини «ирқий қирғинчилиқ» дәп атап, өлүп кәткән пәләстинликләр саниниң елан қилинғинидинму көп икәнликини ейтти.
түркийә авази радийоси хәвири: җосеп боррел белгийәниң пайтәхти бирйусселда өткүзүлгән 25-нөвәтлик кишилик һоқуқ мунбири йиғинида қилған сөзидә, ғәззәниң вәзийити һәққидә тохтилип мундақ деди:
«гәрчә исраилийәниң өзини қоғдаш һоқуқи болсиму, әмма һечким бунчә көп пуқраларниң өлүп кетишини қобул қилалмайду.»
«10-айниң 7-күни һамасниң исраилийәгә қилған һуҗуми ирқий қирғинчилиқ, исраилийәниң ғәззәдә давамлаштуруватқан һуҗумлириму охшашла ирқий қирғинчилиқ һесаблиниду. бир дәһшәт йәнә бирини ақлийалмайду.»
«исраилийәниң һуҗумлири давамида зади қанчилик адәмниң өлүп кәткәнликини һечким билмәйду. һуҗумларда 15 миң кишиниң өлүп кәткәнлики хәвәр қилинмақта, әмма харабиликләрниң астида йәнә нурғун кишиләр болуши мумкин. шуни алаһидә тәкитләп өтимәнки, хәлқара җәмийәт районда йүз бериватқан дәһшәткә қарши техиму көп наразилиқ билдүрүшкә вә бу дәһшәткә хатимә берилишини тәләп қилишқа башлиди. йәһудийларға дүшмәнлик қилмай туруп исраилийәни тәнқидләш мумкин болуши керәк. мән исраилийә дөлитиниң мәвҗутлуқиға қарши чиқмай туруп, икки дөләтлик һәл қилиш түзүмини қоғдаш һоқуқиға игә болуш тәрәпдаримән.»
у йәнә, ийордан дәрйасиниң ғәрбий қирғиқидики қанунсиз йәһудий көчмәнләрни орунлаштуруш һәрикәтлири вә пәләстинликләргә қаритилған зораванлиқларға хатимә берилиши керәкликиниму сөзлиригә илавә қилди.
һамасниң һәрбий қанити болған қәссам биригадилири 7-өктәбир шәнбә күни исраилийәгә қарши «әқса топани» намлиқ кәң көләмлик һуҗум қозғиғанлиқлирини елан қилғаниди.
исраилийә армийәси болса, уруш айропиланлири билән ғәззә шәһиригә «төмүр қилич һәрикити» қозғиғанлиқлирини билдүргәниди.
игилинишичә, исраилийәниң барғансери кәскинлишиватқан һуҗумлири давамида, көпинчиси балилар болуп, 16 миңға йеқин пәләстинлик җенидин айрилған.
