хәлқара җинайи ишлар соти баш мупәттиши исраилийәни хәлқара қанунға һөрмәт қилишқа чақирди

түркийә авази радийоси хәвири: хәлқара җинайи ишлар сотиниң баш мупәттиши кәрим хан пәләстинниң рамаллаһ шәһирини зийарәт қилғандин кейин иҗтимаий алақә адресида һәмбәһрлигән видеода, исраилийәни хәлқара қанунларға риайә қилишқа чақирди.

кәрим хан һәмбәһирлигән йазмисида нурғун инсанниң өлтүрүлгәнлики вә йариланғанлиқини тәкитләп: «әгәр инсанийәтни азрақ болсиму һөрмәтләйдиған болсақ, қанунға һөрмәт қилидиған вақит кәлди. ишханам бу ишларни актип һалда тәкшүрмәктә» деди.

кәрим хан йазмисида тәнқид қилған вә рамаллаһтин айрилиштин илгири көз қарашлириға орун бәргән видео учурида: «мән (исраилийә әмәлдарлири билән көрүшкәндә) қанунға әмәл қилидиған пәйт кәлгәнликини наһайити ениқ ейттим. әгәр исраилийә һазир әмәл қилмиса, кейин шикайәт қилмаслиқи лазим» деди.

мәктәпләр, дохтурханилар, җамәләр, черкавлар вә аилиләр олтурақлашқан өйләрниң хәлқара қанунларда қоғдилидиғанлиқини шундақла бомбардиман қилишқа болмайдиғанлиқини тәкитлигән кәрим хан, җәнвә әһдинамисиниң бовақлар, кичик балилар, айаллар, йашанғанлар вә пуқраларни қоғдаш үчүн бар икәнликини икәнликини тәкитлиди.

кәрим хан инсанпәрвәрлик йардәмлириниң ғәззәгә киришигә тосқунлуқ қилишни қәтий қобул қилғили болмайдиғанлиқини әскәртип: «ғәззәдики дохтурларниң токсиз оператсийә қилиши йаки кичик балиларниң наркоз қилинмай оператсийә қилинишиға һечқандақ баһанә көрсәткили болмайду» деди.

ғәрбий қирғақта исраилийә көчмәнлири садир қилған зораванлиқни «қобул қилғусиз» дәп тәриплигән кәрим хан, бу зораванлиқниң җазасиз қалмаслиқи керәкликини тәкитлиди.