нетанйаһу исраилийә әскәрлириниң еғир талапәткә учриғанлиқини ейтти

түркийә авази радийоси хәвири: исраилийә баш министирлиқ мәһкимиси медийа ишлири ишханисиниң байанатиға қариғанда, нитанийаһу бир һәрбий базини көздин кәчүрүш җәрйанида сөз қилип: «ғәззә шәһириниң чәт мәһәллилиригә йеқинлишиватимиз вә ечинишлиқ талапәтлиримиз бар» дегән.

«биз илгириләватимиз» дегән нетанйаһу, «һечқандақ нәрсиниң өзлирини тосуп қалалмайдиғанлиқи »ни илгири сүргән вә ғәззәниң шималидики пуқраларниң җәнубқа көчүш керәклики тоғрисидики чақириқини қайта тәкитләп, «һамасни бир тәрәп қилиш үчүн, һәрбий һәрикәтлирини тохтатмайдиғанлиқлири»ни әскәрткән.

исраилийә армийәси байанатчиси данийал хагариму мухбирларни күтүвелиш йиғини өткүзүп, исраилийәниң ишғалийәт астидики ғәззәгә қаратқан һуҗумлири тоғрисида мәлумат бәрди.

у ғәззәниң толуқ муһасиригә елинип болғанлиқини, исраилийә қуруқлуқ армийәсиниң алға илгириләватқанлиқини вә уруш тохтитиштин ибарәт бир таллашниң күнтәртиплиридә йоқлуқини тәкитлиди.

йәнә бир тәрәптин, исраилийә армийәси байанат елан қилип, ғәззәдә қуруқлуқ һәрикити башланған 31- өктәбирдин буйан йүз бәргән тоқунушларда 23 исраилийә әскириниң өлгәнликини билдүрди.

байанатта, ғәззәдики түнүгүнки тоқунушларда төт исраилийә әскириниң өлгәнлики, иккисниң еғир йариланғанлиқи қәйт қилинди.

пәләстин исламий қаршилиқ көрситиш һәрикити – һамасниң һәрбий қанити болған «қәссам биригадиси» 7 – өктәбир шәнбә күни исраилийәниң пәләстинликләрниң вә мәсҗиди әқсани өз ичигә алған муқәддәс орунларни һөрмәт вә һоқуқини изчил дәпсәндә қилишиға қарши кәң көләмлик һуҗум қозғиғанлиқини елан қилған. исраилийә армийәсиму ғәззәни шиддәтлик бомбардиман қилишни башлиғаниди.

күнсери кәскинлишиватқан тоқунушларда икки тәрәптә миңларчә адәм талапәткә учриди.