кичик балиларни бомбардиман қилиш өзини қоғдаш әмәс
горазде шәһиридә, «кичик балиларни бомбардиман қилиш өзини қоғдаш әмәс» нами астида, пәләстинликләрни қоллаш йиғилиши өткүзүлди.
түркийә авази радйоси хәвири: түнүгүн (2023-йили 1-нойабир) боснийә - гертсеговинаниң горазде шәһиригә җайлашқан әлийа иззәтбегович көврүкидә пәләстин хәлқини қоллаш йиғилиши өткүзүлди.
йиғилишқа қатнашқучилар урушниң вә балиларни өлтүрүшниң дәрһал тохтитилишни һәмдә исраилийәниң илгирики җинайәтлири сәвәбидин җазаға тартилиши керәкликини тәләп қилди.
йиғилишни тәшкиллигүчи, боснийә-гертсеговина парламенти әзаси дезбрайил баҗрамович: «пәләстин хәлқи вә дунйаниң һәрқайси җайлирида азаб чекиватқан шундақла террорлуқниң зийанкәшликигә учриған барлиқ кишиләр дуч кәлгән барлиқ қийинчилиқларниң ахирлишишини үмид қилимән. ғәззәдә йүз бериватқан ишлар тәсадипийлиқ әмәс. 75 йилдин буйан ғәззә дунйа бойичә әң чоң җаза лагерлиридин бири болуп кәлди» деди.
пәләстинниң баш әлчиси рәзақ намораму пәләстин хәлқигә вакалитән йиғилишқа қатнашқанларға салимини йәткүзди вә боснийә-гертсеговина хәлқиниң шундақла пүткүл дунйа пуқралириниң пәләстинликләрни қоллиғанлиқидин иптихарлинидиғанлиқини һәмдә миннәтдарлиқини билдүрди.
йиғилишға қатнқанларниң қоллиридики «кичк балиларни бомбардиман қилиш өзини қоғдаш әмәс» , «бир кичик балини өлтүрүшниң баһаниси болмайду», «бу ирқий қирғинчилиқтур!», «пәләстин чоқум әркинкә еришиду» дәп шоарлар йезилған лозункилардики учурлар һәмминиң диққитини тартти.
һамасниң һәрбий қанити қассам биригадилири 7-өктәбир (2023) дә исраилийәгә «әқса топани» намлиқ кәң көләмлик һуҗум қозғиғанлиқини елан қилған вә буниңға қарита исраилийәму уруш айропиланлири билән ғәззә райониға қарши «төмүр қилич һәрикити» ни башлиғанлиқини җакарлиған иди.
ғәззәдики пәләстин сәһийә министирлиқи, исраилийәниң вәһшийанә һуҗумлирида 3648 кичик бала вә 2290 айални қошқанда җәмий 8796 пәләстинликниң җенидин айрилғанлиқини вә 22 миң 219 пәләстинликниң йариланғанлиқини елан қилған иди.
