ғәззә һөкүмити б д т оргининиң шималдики мәсулийәттин қачқанлиқини әйиблиди

түркийә авази радийоси хәвири: ғәззә һөкүмити б д т ниң пәләстинлик панаһланғучиларға йардәм бериш хизмәт оргинини (UNRWA) ниң шималдики мәсулийитидин ваз кәчкәнликини әйиблиди.

ғәззә һөкүмити ахбарат ишханисиниң башлиқи сәлам маруф мухбирларни күтүвелиш йиғинида, исраилийәниң 25 күнлүк урушиниң ғәззәгә көрсәткән тәсири һәққидә тохтилип: «UNRWA ниң шәһәрниң шималидики мәсулийитидин ваз кәчкәнликини вә хизмитини җәнуб биләнла чәклик тутушини тоғра көрситәләйдиған һечнәрсә йоқ» деди.

сәлам маруф UNRWA ниң инсанпәрвәрлик йардәм аптомобиллириниң ғәззәгә киришини қәстән астилатқанлиқини вә кечиктүргәнликини һәмдә ғәззә райониға, болупму шималиға киришигә тосқунлуқ қилғанлиқини билдүрди.

у: «UNRWA» ниң баш комиссари филип лаззарини ғәззәдики ишғалийәтчи күчләрниң бомбардиманлиридин қаттиқ чөчүгәнликини ейтқанлиқини вә мисли көрүлмигән вәйранчилиқниң дәриҗисини тилға алғанлиқини  әскәртип: «лаззарининиң байанати,ишғалийәтчиләрниң ғәззә хәлқигә қарита ирқий қирғинчилиқ қиливатқанлиқиниң хәлқаралиқ испатидур вә тәстиқидур» деди.

ғәззәниң вәзийитини русийә-украина урушидики вәзийәткә селиштурған сәлам маруф йәнә мундақ деди:

«русийә-украина уруши башланғандин кейинки 1.5 йилда, өлтүрүлгән украина пуқралириниң сани 9 миң, уларниң 500 нәпири кичик бала, йариланғанларниң омумий сани 15 миң. әмма, қисқиғинә 25 күн ичидә ғәззәдә 8 миң 525 киши өлтүрүлди. уларниң 3542 и кичик бала, 2 миң 187 нәпири айал вә йаш қизлардур, һәмдә йәнә 21 миң 543 киши йариланди. буниңдин башқа йәнә 2 миң адәм йоқап кәтти.»

маруф исраилийәниң һуҗумлири сәвәбидин ғәззәниң барлиқ районлирини өз ичигә алған зийанниң 3 милйард доллардин ашқанлиқини билдүрди.

һамасниң һәрбий қанити қассам биригадилири 7-өктәбир (2023) дә исраилийәгә «әқса топани» намлиқ кәң көләмлик һуҗум қозғиғанлиқини елан қилған вә исраилийәму уруш айропилани билән ғәззә райониға қарши «төмүр қилич» һәрикитини башлиғанлиқини җакарлиған иди.