ئىسرائىلىيە ئەسكەرلىرى يەنە بىر پەلەستىنلىكنىڭ جېنىغا زامىن بولدى

تۈركىيە ئاۋازى رادىيوسى خەۋىرى: پەلەستىن خەۋەر ئاگېنتلىقى — ۋافانىڭ خەۋەر قىلىشىچە، ئىسرائىلىيە ئەسكەرلىرى ئەلبىرەنىڭ ئەتتاۋىل تېغى رايونىغا قۇرۇلۇۋاتقان پساگوت يەھۇدىيلار ئولتۇراق رايونىغا يېقىن جايدا بىر ماشىنىنى ئوققا تۇتقان.

پەلەستىن سەھىيە مىنىستىرلىقى، ھۇجۇمدا مۇھەممەد جىبرىل رۇمماننىڭ قازا قىلغانلىقىنى، يەنە بىر پەلەستىنلىكنىڭ بەدىنىنىڭ تۆۋەنكى قىسمىنىڭ ئازراق يارىلانغانلىقىنى ئۇقتۇردى.

ئىسرائىلىيە ئارمىيەسىنىڭ باياناتىدا بولسا، پاساگوت ئەتراپىدىكى ھەربىي نۇقتىغا مولوتوف كوكتېل (ئاتەش توپ) تاشلىغانلىقى ئىلگىرى سۈرۈلگەن ئىككى ياشنىڭ ئوق چىقىرىش ئارقىلىق «بىر تەرەپ قىلىنغانلىقى» بىلدۈرۈلدى.

ئىشغالىيەت ئاستىدىكى غەربىي قىرغاق ئۇزۇندىن بۇيان ئىسرائىلىيە ئەسكەرلىرىنىڭ بېسىملىرى ۋە يەھۇدىي كۆچمەنلەرنىڭ ھۇجۇملىرىغا شاھىت بولماقتا.