رۇسىيە ھەربىي خامچۇتىنى زور مىقداردا ئاشۇرۇشنى پىلانلىماقتا

تۈركىيە ئاۋازى رادىيوسى خەۋىرى: رۇسىيە فېدېراتسىيەسىنىڭ ئۈچ يىللىق دۆلەت خامچوت پىلانىنى قولغا چۈشۈرگەن بلومبېرگ ئاگېنتلىقى، رۇسىيەنىڭ 2025-يىلى ھەربىي چىقىملارنىڭ 3 تىرىليون رۇبلى (106 مىليارد دوللار) ئاشۇرۇشنى ئويلاۋاتقانلىقىنى، شۇنداق بولسا، كېلەر يىلى رۇسىيەنىڭ ھەربىي خامچوتىنىڭ %25 تىن كۆپرەك ئاشۇرۇلغان بولىدىغانلىقىنى خەۋەر قىلدى.

بلومبېرگنىڭ خەۋىرىگە ئاساسلانغاندا، 2025-يىلى مۇداپىئە ۋە ئىچكى بىخەتەرلىك چىقىملىرى پۈتۈن خامچوتنىڭ %40ىگە توغرا كېلىدىكەن. بۇ 1991-يىلدىن بۇيان خاتىرىلەنگەن تۇنجى رېكورد بولۇپ، مائارىپ، ساغلاملىق، ئىجتىمائىي سىياسەتلەر ۋە دۆلەت ئىقتىسادى خامچوتلىرىنىڭ يىغىندىسىدىنمۇ كۆپ ئىكەن.

خامچوتتىكى مەخپىي چىقىم ساھەلىرىمۇ ئاشۇرۇلىكەن. خەۋەردە كۆرسىتىلىشىچە، 2025-يىلى مەخپىي چىقىملارنىڭ 132 مىليارد دوللارغا يېتىشى مۇمكىن ئىكەن، ئۆتكەن يىلى مەخپىي چىقىملارغا 113 مىليارد دوللار ئاجىرىتىلغانىدىكەن. بۇ پۇلنىڭ كۆپ قىسمى قورال سېتىۋېلىش ۋە ئۇكرائىنا ئۇرۇشىنى داۋاملاشتۇرۇشقا سەرپ قىلىنىدىكەن.