б д т: пәләстин мәсилисидә икки дөләтлик һәл қилиш чарисини қоллашни давамлаштуримиз
бирләшкән дөләтләр тәшкилати (б д т) байанатчиси истефан дуҗаррик, б д т ниң исраилийә- пәләстин мәсилисидә икки дөләтлик һәл қилиш чарисини қоллашни давамлаштуридиғанлиқини ейтти.
түркийә авази радийоси хәвири: б д т байанатчиси дуҗаррик күндилик мухбирларни күтүвелиш йиғинида мухбирларниң соаллириға җаваб бәрди.
у исраилийә баш министири бенйамин нетанйаһуниң 78 - нөвәтлик б д т омумий кеңиши йиғинидики сөзи җәрйанида, пәләстин земинлирини исраилийә чеграси ичигә алған бир хәритини қоллинишиға билдүрүлгән наразилиқларға мунасивәтлик бир соалға җаваб берип: «биз әза дөләтләрниң омумий кеңәш йиғинида немиләрни дегәнлики йаки немиләрни көрсәткәнликигә арилашмаймиз вә арилишишниму халимаймиз» деди.
дуҗаррик мәзкур хәритиниң б д т ниң мәйданини әкс әттүрмәйдиғанлиқини байан қилип: «биз һәр муһитта икки дөләтлик һәл қилиш чарисини қоллашни давамлаштуримиз» деди.
у пәләстин даимий вәкилиниң нетанйаһуниң қилмишини әйиблигән мәктупиниң б д т баш катипиға йетип кәлгән-кәлмигәнликини техи җәзмләштүрәлмәйдиғанлиқини билдүрүп, бу хил һәрикәтләрниң б д т ниң мәйданини өзгәртмәйдиғанлиқини әскәртти.
