ненан несиҗ: әзалиқ мусаписи узирап кәтсә, йавропа иттипақи бизгә нисбәтән мәнисини йоқитиду
боснийә - гертсеговина бихәтәрлик министири ненад несиҗ, әгәр дөлити 2030 - йилиғичә йавропа иттипақиға әза болалмиса, йавропа иттипақиниң өзлиригә нисбәтән мәнисини йоқитидиғанлиқини ейтти.
түркийә авази радийоси хәвири: ненад несиҗ пайтәхт сарайевода йавропа иттипақиниң боснийә - гертсеговина вәкилләр өмики башлиқи йоһан саттлер билән көрүшкәндин кейин, қошма мухбирларни күтүвелиш йиғини өткүзди.
саттлер билән тәртипсиз көчмәнләргә қарши туруш тоғрисида параңлашқанлиқини билдүргән несиҗ: «әгәр биз 2030 - йилиғичә йавропа иттипақиға әза болалмисақ, йавропа иттипақи бизгә нисбәтән мәнисини йоқитиду. бу барлиқ әмәлдарлиримизниң ениқ учури болуши керәк. улар маңа <бу бир җәрйан> дәватиду. мән буниң бир җәрйан икәнликигә қошулимән, әмма һәр бир җәрйанниң ахирлишидиған нуқтиси бар. бизниң йавропа иттипақиға тутишидиған йолимизму чоқум иҗабий ахирлишиши керәк» деди.
несиҗ боснийә - гертсеговинаниң тәртипсиз көчмәнләргә қарита чеграсини қоғдишини вә коллектип бихәтәрликниң бир қисми болушини тәләп қиливатқан йавропа иттипақиму боснийә - гертсеговинаниң иттипаққа толуқ әза болуш арзусиниму чүшиниши керәкликини оттуриға қойди.
«өз пуқралириниң һайати бихәтәрликини қандақ қоғдашни билидиғанлиқлирини, һечкимниң хәтәргә дучар болушиға йол қоймайдиғанлиқлири»ни әскәрткән несиҗ, сөзини давамлаштуруп: «бүгүн биз бу йәрдә йавропа иттипақиға йардәм бериватимиз, йавропа иттипақиниңму әзалиқ мусапимиздәәпиримиздә бизгә йардәм қилишини үмид қилимиз» дегәнләрни қәйт қилди.
сатлер тәртипсиз көчмәнлик тоғрисида тохтлип: «бу бизниң ортақ мәҗбурийитимиз. әлвәттә, техиму көп йүкни үстигә еливатқан йавропа иттипақиға әза нурғун дөләт бар. бу бир ортақ вәзипә болуп, биз давамлиқ бирликтә тиришимиз» деди.
боснийә - гертсеговина 2022 - йили 15 - декабир «кандидат дөләт» салаһийитигә еришиш арқилиқ йавропа иттипақиға әза болуш мусаписидә муһим қәдәм ташлиғаниди.
